अध्याय 17: जनक, राम के भाई और हनुमान

प्रनवउँ परिजन सहित बिदेहू । जाहि राम-पद गूढ़-सनेहू ॥
जोग भोग महँ राखेउ गोई । राम बिलोकत प्रगटेउ सोई ॥

pranavaum̐ parijana sahita bidehū | jāhi rāma-pada gūr̤ha-sanehū ||
joga bhoga maham̐ rākheu goī | rāma bilokata pragaṭeu soī ||

प्रनवउँ प्रथम भरत के चरना । जासु नेम ब्रत जाइ न बरना ॥
राम-चरन-पङ्कज मन जासू । लुबुध मधुप इव तजइ न पासू ॥

pranavaum̐ prathama bharata ke caranā | jāsu nema brata jāi na baranā ||
rāma-carana-paṅkaja mana jāsū | lubudha madhupa iva tajai na pāsū ||

बन्दउँ लछिमन-पद-जल जाता । सीतल सुभग भगत-सुख दाता ॥
रघुपति कीरति बिमल पताका । दंड-समान भयउ जस जाका ॥

bandaum̐ lachimana-pada-jala jātā | sītala subhaga bhagata-sukha dātā ||
raghupati kīrati bimala patākā | daṃḍa-samāna bhayau jasa jākā ||

सेष सहस्त्र-सीस जग कारन । जो अवतरेउ भूमि-भय-टारन ॥
सदा सो सानुकूल रह मो पर । कृपासिन्धु सौमित्रि गुनाकर ॥

seṣa sahastra-sīsa jaga kārana | jo avatareu bhūmi-bhaya-ṭārana ||
sadā so sānukūla raha mo para | kṛpāsindhu saumitri gunākara ||

रिपुसूदन पद कमल नमामी । सूर सुसील भरत अनुगामी ॥
महाबीर बिनवउँ हनुमाना । राम जासु जस आपु बखाना ॥

ripusūdana pada kamala namāmī | sūra susīla bharata anugāmī ||
mahābīra binavaum̐ hanumānā | rāma jāsu jasa āpu bakhānā ||