अध्याय 105: याज्ञवल्क्य द्वारा रामलीला का आरम्भ

मैँ जाना तुम्हार गुन सीला । कहउँ सुनहु अब रघुपति-लीला ॥
सुनु मुनि आजु समागम तोरें । कहि न जाइ जस सुख मन मोरें ॥

maim̐ jānā tumhāra guna sīlā | kahaum̐ sunahu aba raghupati-līlā ||
sunu muni āju samāgama toreṃ | kahi na jāi jasa sukha mana moreṃ ||

राम चरित अति अमित मुनीसा । कहि न सकहिँ सत कोटि अहीसा ॥
तदपि जथा स्रुत कहउँ बखानी । सुमिरि गिरापति प्रभु धनु-पानी ॥

rāma carita ati amita munīsā | kahi na sakahim̐ sata koṭi ahīsā ||
tadapi jathā sruta kahaum̐ bakhānī | sumiri girāpati prabhu dhanu-pānī ||

सारद दारु-नारि-सम स्वामी । राम-सूत्रधर अन्तरजामी ॥
जेहि पर कृपा करहिँ जन जानी । कबि-उर-अजिर नचावहिँ बानी ॥

sārada dāru-nāri-sama svāmī | rāma-sūtradhara antarajāmī ||
jehi para kṛpā karahim̐ jana jānī | kabi-ura-ajira nacāvahim̐ bānī ||

प्रनवउँ सोइ कृपाल रघुनाथा । बरनउँ बिसद तासु गुन गाथा ॥
परम रम्य गिरिबर कैलासू । सदा जहाँ सिव-उमा निवासू ॥

pranavaum̐ soi kṛpāla raghunāthā | baranaum̐ bisada tāsu guna gāthā ||
parama ramya giribara kailāsū | sadā jahām̐ siva-umā nivāsū ||