अध्याय 54: समाचार सुनकर कौसल्या स्तब्ध

बचन बिनीत मधुर रघुबर के । सर सम लगे मातु उर करके ॥
सहमि सूखि सुनि सीतलि बानी । जिमि जवास परें पावस पानी ॥

bacana binīta madhura raghubara ke | sara sama lage mātu ura karake ||
sahami sūkhi suni sītali bānī | jimi javāsa pareṃ pāvasa pānī ||

कहि न जाइ कछु हृदय बिषादू । मनहुँ मृगी सुनि केहरि-नादू ॥
नयन सजल तन थर थर काँपी । माजहि खाइ मीन जनु मापी ॥

kahi na jāi kachu hṛdaya biṣādū | manahum̐ mṛgī suni kehari-nādū ||
nayana sajala tana thara thara kām̐pī | mājahi khāi mīna janu māpī ||

धरि धीरज सुत-बदन निहारी । गदगद-बचन कहति महतारी ॥
तात पितहि तुम्ह प्रानपिआरे । देखि मुदित नित चरित तुम्हारे ॥

dhari dhīraja suta-badana nihārī | gadagada-bacana kahati mahatārī ||
tāta pitahi tumha prānapiāre | dekhi mudita nita carita tumhāre ||

राज देन कहँ सुभ दिन साधा । कहेउ जान बन केहिं अपराधा ॥
तात सुनावहु मोहि निदानू । को दिनकर-कुल भयउ कृसानू ॥

rāja dena kaham̐ subha dina sādhā | kaheu jāna bana kehiṃ aparādhā ||
tāta sunāvahu mohi nidānū | ko dinakara-kula bhayau kṛsānū ||