अध्याय 306: श्रीराम भरत से भार उठाने को कहते हैं

सहित समाज तुम्हार हमारा । घर बन गुर प्रसाद रखवारा ॥
मातु पिता गुरु स्वामि निदेसू । सकल धरम धरनी-धर-सेसू ॥

sahita samāja tumhāra hamārā | ghara bana gura prasāda rakhavārā ||
mātu pitā guru svāmi nidesū | sakala dharama dharanī-dhara-sesū ||

सो तुम्ह करहु करावहु मोहू । तात तरनिकुल पालक होहू ॥
साधन एक सकल सिधि देनी । कीरति सुगति भूति-मय बेनी ॥

so tumha karahu karāvahu mohū | tāta taranikula pālaka hohū ||
sādhana eka sakala sidhi denī | kīrati sugati bhūti-maya benī ||

सो बिचारि सहि सङ्कट भारी । करहु प्रजा परिवार सुखारी ॥
बाँटी बिपति सबहिँ मोहि भाई । तुम्हहिं अवधि भरि बड़ि कठिनाई ॥

so bicāri sahi saṅkaṭa bhārī | karahu prajā parivāra sukhārī ||
bām̐ṭī bipati sabahim̐ mohi bhāī | tumhahiṃ avadhi bhari bar̤i kaṭhināī ||

जानि तुम्हहिं मृदु कहउँ कठोरा । कुसमयँ तात न अनुचित मोरा ॥
होहिं कुठायँ सुबन्धु सुहाए । ओड़िअहिं हाथ असनिहु के घाये ॥

jāni tumhahiṃ mṛdu kahaum̐ kaṭhorā | kusamayam̐ tāta na anucita morā ||
hohiṃ kuṭhāyam̐ subandhu suhāe | or̤iahiṃ hātha asanihu ke ghāye ||