अध्याय 187: चित्रकूट की ओर यात्रा आरम्भ

चक्क चक्कि जिमि पुर-नर-नारी । चहत प्रात उर आरत भारी ॥
जागत सब निसि भयउ बिहाना । भरत बोलाये सचिव सुजाना ॥

cakka cakki jimi pura-nara-nārī | cahata prāta ura ārata bhārī ||
jāgata saba nisi bhayau bihānā | bharata bolāye saciva sujānā ||

कहेउ लेहु सब तिलक-समाजू । बनहिं देव मुनि रामहिं राजू ॥
बेगि चलहु सुनि सचिव जोहारे । तुरत तुरग रथ नाग सँवारे ॥

kaheu lehu saba tilaka-samājū | banahiṃ deva muni rāmahiṃ rājū ||
begi calahu suni saciva johāre | turata turaga ratha nāga sam̐vāre ||

अरुन्धती अरु अगिनि समाऊ । रथ चढ़ि चले प्रथम मुनिराऊ ॥
बिप्र बृन्द चढ़ि बाहन नाना । चले सकल तप तेज निधाना ॥

arundhatī aru agini samāū | ratha car̤hi cale prathama munirāū ||
bipra bṛnda car̤hi bāhana nānā | cale sakala tapa teja nidhānā ||

नगर लोग सब सजि सजि जाना । चित्रकूट कहँ कीन्ह पयाना ॥
सिबिका सुभग न जाहिँ बखानी । चढ़ि चढ़ि चलत भई सब रानी ॥

nagara loga saba saji saji jānā | citrakūṭa kaham̐ kīnha payānā ||
sibikā subhaga na jāhim̐ bakhānī | car̤hi car̤hi calata bhaī saba rānī ||