अध्याय 38: काम की सेना और तीन प्रबल शत्रु

बिटप-बिसाल लता अरुझानी । बिबिध बितान दिये जनु तानी ॥
कदलि ताल घर धुजा पताका । देखि न मोह धीर मन जाका ॥

biṭapa-bisāla latā arujhānī | bibidha bitāna diye janu tānī ||
kadali tāla ghara dhujā patākā | dekhi na moha dhīra mana jākā ||

बिबिध भाँति फूले तरु नाना । जनु बानैत बने बहु बाना ॥
कहुँ कहुँ सुन्दर बिटप सुहाये । जनु भट बिलग बिलग होइ छाये ॥

bibidha bhām̐ti phūle taru nānā | janu bānaita bane bahu bānā ||
kahum̐ kahum̐ sundara biṭapa suhāye | janu bhaṭa bilaga bilaga hoi chāye ||

कूजत पिक मानहुँ गज माते । ढेक महोख ऊँट बिसराते ॥
मोर-चकोर-कीर बर बाजी । पारावत मराल सब ताजी ॥

kūjata pika mānahum̐ gaja māte | ḍheka mahokha ūm̐ṭa bisarāte ||
mora-cakora-kīra bara bājī | pārāvata marāla saba tājī ||

तीतिर लावक पदचर जूथा । बरनि न जाइ मनोज बरूथा ॥
रथ गिरि सिला दुन्दुभी झरना । चातक बन्दी गुन-गन बरना ॥

tītira lāvaka padacara jūthā | barani na jāi manoja barūthā ||
ratha giri silā dundubhī jharanā | cātaka bandī guna-gana baranā ||

मधुकर-मुखर भेरि सहनाई । त्रिबिध बयारि बसीठीं आई ॥
चतुरङ्गिनी सेन सँग लीन्हें । बिचरत मनहुँ चुनौती दीन्हें ॥

madhukara-mukhara bheri sahanāī | tribidha bayāri basīṭhīṃ āī ||
caturaṅginī sena sam̐ga līnheṃ | bicarata manahum̐ cunautī dīnheṃ ||

लछिमन देखत काम अनीका । रहहिँ धीर तिन्ह कै जग लीका ॥
एहि कें एक परम-बल नारी । तेहि तैं उबर सुभट सोइ भारी ॥

lachimana dekhata kāma anīkā | rahahim̐ dhīra tinha kai jaga līkā ||
ehi keṃ eka parama-bala nārī | tehi taiṃ ubara subhaṭa soi bhārī ||