अध्याय 22: राम का समाचार सुन रावण की नींद उड़ी

सुनत सभासद उठे अकुलाई । समुझाई गहि बाहँ उठाई ॥
कह लङ्केस कहसि किन बाता । केइ तब नासा कान निपाता ॥

sunata sabhāsada uṭhe akulāī | samujhāī gahi bāham̐ uṭhāī ||
kaha laṅkesa kahasi kina bātā | kei taba nāsā kāna nipātā ||

अवध-नृपति-दसरथ के जाये । पुरुष सिंघ बन खेलन आये ॥
समुझि परी मोहि उन्ह कै करनी । रहित निसाचर करिहहिँ धरनी ॥

avadha-nṛpati-dasaratha ke jāye | puruṣa siṃgha bana khelana āye ||
samujhi parī mohi unha kai karanī | rahita nisācara karihahim̐ dharanī ||

जिन्ह कर भुज-बल पाइ दसानन । अभय भये विचरत मुनि कानन ॥
देखत बालक काल समाना । परम धीर धन्वी गुन नाना ॥

jinha kara bhuja-bala pāi dasānana | abhaya bhaye vicarata muni kānana ||
dekhata bālaka kāla samānā | parama dhīra dhanvī guna nānā ||

अतुलित बल प्रताप द्वौ भ्राता । खल-बध रत सुर-मुनि-सुख-दाता ॥
सोभा-धाम राम अस नामा । तिन्ह के संग नारि एक स्यामा ॥

atulita bala pratāpa dvau bhrātā | khala-badha rata sura-muni-sukha-dātā ||
sobhā-dhāma rāma asa nāmā | tinha ke saṃga nāri eka syāmā ||

रूप-रासि बिधि नारि सँवारी । रति सत कोटि तासु बलिहारी ॥
तासु अनुज काटे श्रुति नासा । सुनि तव भगिनि करहिँ परिहासा ॥

rūpa-rāsi bidhi nāri sam̐vārī | rati sata koṭi tāsu balihārī ||
tāsu anuja kāṭe śruti nāsā | suni tava bhagini karahim̐ parihāsā ||

खर-दूषन सुनि लगे पुकारा । छन महँ सकल कटक, उन्ह मारा ॥
खर-दूषन-तिसिरा कर घाता । सुनि दससीस जरे सब गाता ॥

khara-dūṣana suni lage pukārā | chana maham̐ sakala kaṭaka, unha mārā ||
khara-dūṣana-tisirā kara ghātā | suni dasasīsa jare saba gātā ||