अध्याय 367: नागपत्नी ब्राह्मण का सत्कार करती है

स वनानि विचित्राणि तीर्थानि च सरांसि च ।
अभिगच्छन्क्रमेण स्म कंचिन्मुनिमुपस्थितः

sa vanāni vicitrāṇi tīrthāni ca sarāṃsi ca |
abhigacchankrameṇa sma kaṃcinmunimupasthitaḥ

तं स तेन यथोद्दिष्टं नागं विप्रेण ब्राह्मणः ।
पर्यपृच्छद्यथान्यायं श्रुत्वैव च जगाम सः

taṃ sa tena yathoddiṣṭaṃ nāgaṃ vipreṇa brāhmaṇaḥ |
paryapṛcchadyathānyāyaṃ śrutvaiva ca jagāma saḥ

सोऽभिगम्य यथान्यायं नागायतनमर्थवित् ।
प्रोक्तवानहमस्मीति भोःशब्दालंकृतं वचः

so'bhigamya yathānyāyaṃ nāgāyatanamarthavit |
proktavānahamasmīti bhoḥśabdālaṃkṛtaṃ vacaḥ

तत्तस्य वचनं श्रुत्वा रूपिणी धर्मवत्सला ।
दर्शयामास तं विप्रं नागपत्नी पतिव्रता ।

tattasya vacanaṃ śrutvā rūpiṇī dharmavatsalā |
darśayāmāsa taṃ vipraṃ nāgapatnī pativratā |

सा तस्मै विधिवत्पूजां चक्रे धर्मपरायणा ।
स्वागतेनागतं कृत्वा किं करोमीति चाब्रवीत्

sā tasmai vidhivatpūjāṃ cakre dharmaparāyaṇā |
svāgatenāgataṃ kṛtvā kiṃ karomīti cābravīt

विश्रान्तोऽभ्यर्चिंतश्चास्मि भवत्या श्लक्ष्णया गिरा ।
द्रष्टुमिच्छामि भवति देवं नागमनुत्तमम्

viśrānto'bhyarciṃtaścāsmi bhavatyā ślakṣṇayā girā |
draṣṭumicchāmi bhavati devaṃ nāgamanuttamam

एतद्धि परमं कार्यमेतन्मे परमप्सितम् ।
अनेन चार्थेनास्म्यद्य संप्राप्तः पन्नगाश्रमम्

etaddhi paramaṃ kāryametanme paramapsitam |
anena cārthenāsmyadya saṃprāptaḥ pannagāśramam

आर्यः सूर्यरथं वोढुं गतोऽसौ मासचारिकः ।
सप्ताष्टभिर्दिनैर्विप्र दर्शयिष्यत्यसंशयम्

āryaḥ sūryarathaṃ voḍhuṃ gato'sau māsacārikaḥ |
saptāṣṭabhirdinairvipra darśayiṣyatyasaṃśayam

एतद्विदितमार्यस्य विवासकरणं तव ।
भर्तुर्भवतु किंचान्यत्क्रियतां तद्वदस्व मे

etadviditamāryasya vivāsakaraṇaṃ tava |
bharturbhavatu kiṃcānyatkriyatāṃ tadvadasva me

अनेन निश्चयेनाहं साध्वि संप्राप्तवानिह ।
प्रतीक्षन्नागमं देवि वत्स्याम्यस्मिन्प्रहावने

anena niścayenāhaṃ sādhvi saṃprāptavāniha |
pratīkṣannāgamaṃ devi vatsyāmyasminprahāvane

संप्राप्तस्यैव चाव्यग्रमावेद्योऽहमिहागतः ।
मयाभिगमनं प्राप्तो वाच्यश्च वचनं त्वया

saṃprāptasyaiva cāvyagramāvedyo'hamihāgataḥ |
mayābhigamanaṃ prāpto vācyaśca vacanaṃ tvayā

अहमप्यत्र वत्स्यामि गोमत्याः पुलिने शुभे ।
कालं परिमिताहारो यथोक्तं परिपालयन्

ahamapyatra vatsyāmi gomatyāḥ puline śubhe |
kālaṃ parimitāhāro yathoktaṃ paripālayan

ततः स विप्रस्तां नागीं समाधाय पुनःपुनः ।
वेदवित्पुलिनं नद्याः प्रययौ ब्राह्मणर्भषः

tataḥ sa viprastāṃ nāgīṃ samādhāya punaḥpunaḥ |
vedavitpulinaṃ nadyāḥ prayayau brāhmaṇarbhaṣaḥ