अध्याय 363: महापद्म का ब्राह्मण परम धर्म खोजता है

आसीत्किल नरश्रेष्ठ महापद्मे पुरोत्तमे ।
गङ्गाया दक्षिणे तीरे कश्चिद्विप्रः समाहितः

āsītkila naraśreṣṭha mahāpadme purottame |
gaṅgāyā dakṣiṇe tīre kaścidvipraḥ samāhitaḥ

सौम्यः सोमान्वये जातो जितात्मा गोत्रतो भृगुः ।
धर्मनित्यो जितक्रोधो नित्यतप्तो जितेन्द्रियः

saumyaḥ somānvaye jāto jitātmā gotrato bhṛguḥ |
dharmanityo jitakrodho nityatapto jitendriyaḥ

तपःस्वाध्यायनिरतः सत्यः सज्जनसंमतः ।
न्यायप्राप्तेन वित्तेन स्वेन शीलेन चान्वितः

tapaḥsvādhyāyanirataḥ satyaḥ sajjanasaṃmataḥ |
nyāyaprāptena vittena svena śīlena cānvitaḥ

ज्ञाति संबन्धिविपुले पुत्रपौत्रप्रतिष्ठिते ।
कुले महति विख्याते विशिष्टां वृत्तिमास्थितः

jñāti saṃbandhivipule putrapautrapratiṣṭhite |
kule mahati vikhyāte viśiṣṭāṃ vṛttimāsthitaḥ

स पुत्रान्बहुलाँल्लब्ध्वा विपुले कर्मणि स्थितः ।
कुलधर्माश्रितो राजन्धरर्मचर्यास्थितोऽभवत्

sa putrānbahulām̐llabdhvā vipule karmaṇi sthitaḥ |
kuladharmāśrito rājandhararmacaryāsthito'bhavat

ततः स धर्मं वेदोक्तं तथा शास्त्राक्तमेव च ।
शिष्टाचीर्णं च धर्मं च त्रिविधं चिन्त्य चेतसा

tataḥ sa dharmaṃ vedoktaṃ tathā śāstrāktameva ca |
śiṣṭācīrṇaṃ ca dharmaṃ ca trividhaṃ cintya cetasā

किंनु मे स्याच्छुभं कृत्वा किं कृतं किं परायणम् ।
इत्येवं चिन्तयन्नित्यं न च याति विनिश्चयम्

kiṃnu me syācchubhaṃ kṛtvā kiṃ kṛtaṃ kiṃ parāyaṇam |
ityevaṃ cintayannityaṃ na ca yāti viniścayam

तस्यैवं चिन्त्यमानस्य धर्मं परममास्थितः ।
कदाचिदतिथिः प्राप्तो ब्राह्मणः सुसमाहितः

tasyaivaṃ cintyamānasya dharmaṃ paramamāsthitaḥ |
kadācidatithiḥ prāpto brāhmaṇaḥ susamāhitaḥ

स तस्मै सत्क्रियां चक्रे क्रियायुक्तेन हेतुना ।
विश्रान्तं सुसमासीनमिदं वचनमब्रवीत्

sa tasmai satkriyāṃ cakre kriyāyuktena hetunā |
viśrāntaṃ susamāsīnamidaṃ vacanamabravīt