अध्याय 58: पत्नी के दोष और उसके प्रायश्चित्त पर नारद

श्रुतं नराणां चापल्यं परस्त्रीषु प्रजायताम् ।
प्रमदानां तु चापल्ये दोषमिच्छामि वेदितुम्

śrutaṃ narāṇāṃ cāpalyaṃ parastrīṣu prajāyatām |
pramadānāṃ tu cāpalye doṣamicchāmi veditum

एकवर्णे विदोषं तु गमनं पूर्वकालिकम् ।
धाता च समनुज्ञातो विष्णुना तत्तथाऽकरोत्

ekavarṇe vidoṣaṃ tu gamanaṃ pūrvakālikam |
dhātā ca samanujñāto viṣṇunā tattathā'karot

भगलिङ्गे महाप्राज्ञ पूर्वमेव प्रजापतिः ।
ससर्ज ताभ्यां संयोगमनुज्ञातश्चकार सः

bhagaliṅge mahāprājña pūrvameva prajāpatiḥ |
sasarja tābhyāṃ saṃyogamanujñātaścakāra saḥ

अथ विष्णुप्रसादेन भगो दत्तवरः किल ।
तेन चैव प्रसादेन सर्वांल्लोकानुपाश्नुते

atha viṣṇuprasādena bhago dattavaraḥ kila |
tena caiva prasādena sarvāṃllokānupāśnute

तस्मात्तु पुरुषे दोषो ह्यधिको नात्र संशयः ।
विना गर्भं सवर्णेषु न त्याज्या गमनात्स्त्रियः

tasmāttu puruṣe doṣo hyadhiko nātra saṃśayaḥ |
vinā garbhaṃ savarṇeṣu na tyājyā gamanātstriyaḥ

प्रायश्चित्तं यथान्यायं दण्डं कुर्यात्स पण्डितः ।
श्वभिर्वा दंशनं स्नानं सवनत्रितयं निशि

prāyaścittaṃ yathānyāyaṃ daṇḍaṃ kuryātsa paṇḍitaḥ |
śvabhirvā daṃśanaṃ snānaṃ savanatritayaṃ niśi

भूमौ च भस्मशयनं दानं भोगविवर्जितम् ।
दोषगौरवतः कालो द्रव्यगौरवमेव च ।
मर्यादा स्थापिता पूर्वमिति तीर्थान्तरं गते

bhūmau ca bhasmaśayanaṃ dānaṃ bhogavivarjitam |
doṣagauravataḥ kālo dravyagauravameva ca |
maryādā sthāpitā pūrvamiti tīrthāntaraṃ gate

तद्योषितीं तु दीर्घायो नास्ति दोषो व्यतिक्रमे ।
भगतीर्थान्तरे शुद्धो विष्णोस्तु वचनादिह

tadyoṣitīṃ tu dīrghāyo nāsti doṣo vyatikrame |
bhagatīrthāntare śuddho viṣṇostu vacanādiha

रक्ष्याश्चैवान्यसंवादैरन्यगेहाद्विचक्षणैः ।
आसां शुद्धौ विशेषेण कर्मणां फलमश्नुते

rakṣyāścaivānyasaṃvādairanyagehādvicakṣaṇaiḥ |
āsāṃ śuddhau viśeṣeṇa karmaṇāṃ phalamaśnute

नैता वाच्या न वै वध्या न क्लेश्याः शुभमिच्छता ।
विष्णुप्रसादादित्येव भगस्तीर्थान्तरं गतः ।
मासिमासि ऋतुस्तासां दुष्कृतान्यपकर्षति

naitā vācyā na vai vadhyā na kleśyāḥ śubhamicchatā |
viṣṇuprasādādityeva bhagastīrthāntaraṃ gataḥ |
māsimāsi ṛtustāsāṃ duṣkṛtānyapakarṣati

स्त्रियस्तोषकरा नॄणां स्त्रियः पुष्टिप्रदाः सदा ।
पुत्रसेतुप्रतिष्ठाश्च स्त्रियो लोके महाद्युते

striyastoṣakarā nṝṇāṃ striyaḥ puṣṭipradāḥ sadā |
putrasetupratiṣṭhāśca striyo loke mahādyute