अध्याय 15: संक्षेप में आस्तीक: जन्म और सर्पों की रक्षा

मात्रा हि भुजगाः शप्ताः पूर्वं ब्रह्मविदां वर ।
जनमेजयस्य वो यज्ञे धक्ष्यत्यनिलसारथिः

mātrā hi bhujagāḥ śaptāḥ pūrvaṃ brahmavidāṃ vara |
janamejayasya vo yajñe dhakṣyatyanilasārathiḥ

तस्य शापस्य शान्त्यर्थं प्रददौ पन्नगोत्तमः ।
स्वसारमृषये तस्मै सुव्रताय महात्मने

tasya śāpasya śāntyarthaṃ pradadau pannagottamaḥ |
svasāramṛṣaye tasmai suvratāya mahātmane

स च तां प्रतिजग्राह विधिदृष्टेन कर्मणा ।
आस्तीको नाम पुत्रश्च तस्यां जज्ञे महामनाः

sa ca tāṃ pratijagrāha vidhidṛṣṭena karmaṇā |
āstīko nāma putraśca tasyāṃ jajñe mahāmanāḥ

तपस्वी च महात्मा च वेदवेदाङ्गपारगः ।
समः सर्वस्य लोकस्य पितृमातृभयापहः

tapasvī ca mahātmā ca vedavedāṅgapāragaḥ |
samaḥ sarvasya lokasya pitṛmātṛbhayāpahaḥ

अथ दीर्घस्य कालस्य पाण्डवेयो नराधिपः ।
आजहार महायज्ञं सर्पसत्रमिति श्रुतिः

atha dīrghasya kālasya pāṇḍaveyo narādhipaḥ |
ājahāra mahāyajñaṃ sarpasatramiti śrutiḥ

तस्मिन्प्रवृत्ते सत्रे तु सर्पाणामन्तकाय वै ।
मोचयामास ताञ्शापादास्तीकः सुमहातपाः

tasminpravṛtte satre tu sarpāṇāmantakāya vai |
mocayāmāsa tāñśāpādāstīkaḥ sumahātapāḥ

भ्रातॄंश्च मातुलांश्चैव तथैवान्यान्स पन्नगान् ।
पितॄंश्च तारयामास संतत्या तपसा तथा

bhrātṝṃśca mātulāṃścaiva tathaivānyānsa pannagān |
pitṝṃśca tārayāmāsa saṃtatyā tapasā tathā

व्रतैश्च विविधैर्ब्रह्मन्स्वाध्यायैश्चानृणोऽभवत् ।
देवांश्च तर्पयामास यज्ञैर्विविधदक्षिणैः

vrataiśca vividhairbrahmansvādhyāyaiścānṛṇo'bhavat |
devāṃśca tarpayāmāsa yajñairvividhadakṣiṇaiḥ

ऋषींश्च ब्रह्मचर्येम सन्तत्या च पितामहान् ।
अपहृत्य गुरं भारं पितॄणां संशितव्रतः

ṛṣīṃśca brahmacaryema santatyā ca pitāmahān |
apahṛtya guraṃ bhāraṃ pitṝṇāṃ saṃśitavrataḥ

जरत्कारुर्गतः स्वर्गं सहितः स्वैः पितामहैः ।
आस्तीकं च सुतं प्राप्य धर्मं चानुत्तमं मुनिः

jaratkārurgataḥ svargaṃ sahitaḥ svaiḥ pitāmahaiḥ |
āstīkaṃ ca sutaṃ prāpya dharmaṃ cānuttamaṃ muniḥ

जरत्कारुः सुमहता कालेन स्वर्गमेयिवान् ।
एतदाख्यानमास्तीकं यथावत्कथितं मया ।
प्रब्रूहि भृगुशार्दूल किमन्यत्कथयामि ते

jaratkāruḥ sumahatā kālena svargameyivān |
etadākhyānamāstīkaṃ yathāvatkathitaṃ mayā |
prabrūhi bhṛguśārdūla kimanyatkathayāmi te