Chapter 33: Virabhadra marches with the ganas to Kanakhala

इत्युक्तं श्रीमहेशस्य श्रुत्वा वचनमादरात् ।
वीरभद्रोतिसंतुष्टः प्रणनाम महेश्वरम

ityuktaṃ śrīmaheśasya śrutvā vacanamādarāt |
vīrabhadrotisaṃtuṣṭaḥ praṇanāma maheśvarama

शासनं शिरसा धृत्वा देवदेवस्य शूलिनः ।
प्रचचाल ततः शीघ्रं वीरभद्रो मखं प्रति

śāsanaṃ śirasā dhṛtvā devadevasya śūlinaḥ |
pracacāla tataḥ śīghraṃ vīrabhadro makhaṃ prati

शिवोथ प्रेषयामास शोभार्थं कोटिशो गणान् ।
तेन सार्द्धं महावीरान्मलयानलसन्निभान्

śivotha preṣayāmāsa śobhārthaṃ koṭiśo gaṇān |
tena sārddhaṃ mahāvīrānmalayānalasannibhān

अथ ते वीरभद्रस्य पुरतः प्रबला गणाः ।
पश्चादपि ययुर्वीराः कुतूहलकरा गणाः

atha te vīrabhadrasya purataḥ prabalā gaṇāḥ |
paścādapi yayurvīrāḥ kutūhalakarā gaṇāḥ

वीरभद्रसमेता येगणाश्शतसहस्रशः ।
पार्षदाः कालकालस्य सर्वे रुद्रस्वरूपिणः

vīrabhadrasametā yegaṇāśśatasahasraśaḥ |
pārṣadāḥ kālakālasya sarve rudrasvarūpiṇaḥ

गणैस्समेतः किलतैर्महात्मा स वीरभद्रो हरवेषभूषणः ।
सहस्रबाहुर्भुजगाधिपाढ्यो ययौ रथस्थः प्रबलोतिभीकरः

gaṇaissametaḥ kilatairmahātmā sa vīrabhadro haraveṣabhūṣaṇaḥ |
sahasrabāhurbhujagādhipāḍhyo yayau rathasthaḥ prabalotibhīkaraḥ

नल्वानं च सहस्रे द्वे प्रमाणं स्यंदनस्य हि ।
अयुतेनैव सिंहानां वाहनानां प्रयत्नतः

nalvānaṃ ca sahasre dve pramāṇaṃ syaṃdanasya hi |
ayutenaiva siṃhānāṃ vāhanānāṃ prayatnataḥ

तथैव प्रबलाः सिंहा बहवः पार्श्वरक्षकाः ।
शार्दूला मकरा मत्स्या गजास्तत्र सहस्रशः

tathaiva prabalāḥ siṃhā bahavaḥ pārśvarakṣakāḥ |
śārdūlā makarā matsyā gajāstatra sahasraśaḥ

वीरभद्रे प्रचलिते दक्षनाशाय सत्वरम् ।
कल्पवृक्षसमुत्सृष्टा पुष्पवृष्टिरभूत्तदा

vīrabhadre pracalite dakṣanāśāya satvaram |
kalpavṛkṣasamutsṛṣṭā puṣpavṛṣṭirabhūttadā

तुष्टुवुश्च गणा वीर शिपिविष्टे प्रचेष्टितम् ।
चक्रुः कुतूहलं सर्वे तस्मिंश्च गमनोत्सवैः

tuṣṭuvuśca gaṇā vīra śipiviṣṭe praceṣṭitam |
cakruḥ kutūhalaṃ sarve tasmiṃśca gamanotsavaiḥ

काली कात्यायिनीशानी चामुंडा मुंडमर्दिनी ।
भद्रकाली तथा भद्रा त्वरिता वैष्णवी तथा

kālī kātyāyinīśānī cāmuṃḍā muṃḍamardinī |
bhadrakālī tathā bhadrā tvaritā vaiṣṇavī tathā

एताभिर्नवदुर्गाभिर्महाकाली समन्विता ।
ययौ दक्षविनाशाय सर्वभूतगणैस्सह

etābhirnavadurgābhirmahākālī samanvitā |
yayau dakṣavināśāya sarvabhūtagaṇaissaha

डाकिनी शाकिनी चैव भूतप्रमथगुह्यकाः ।
कूष्मांडाः पर्पटा श्चैव चटका ब्रह्मराक्षसाः

ḍākinī śākinī caiva bhūtapramathaguhyakāḥ |
kūṣmāṃḍāḥ parpaṭā ścaiva caṭakā brahmarākṣasāḥ

भैरवाः क्षेत्रपालाश्च दक्षयज्ञविनाशकाः ।
निर्ययुस्त्वरितं वीराश्शिवाज्ञाप्रतिपालकाः

bhairavāḥ kṣetrapālāśca dakṣayajñavināśakāḥ |
niryayustvaritaṃ vīrāśśivājñāpratipālakāḥ

तथैव योगिनीचक्रं चतुःषष्टिगणान्वितम् ।
निर्ययौ सहसा क्रुद्धं दक्षयज्ञं विनाशितुम्

tathaiva yoginīcakraṃ catuḥṣaṣṭigaṇānvitam |
niryayau sahasā kruddhaṃ dakṣayajñaṃ vināśitum

तेषां गणानां सर्वेषां संख्यानं शृणु नारद ।
महाबलवतां संघोमुख्यानां धैर्यशालिनाम्

teṣāṃ gaṇānāṃ sarveṣāṃ saṃkhyānaṃ śṛṇu nārada |
mahābalavatāṃ saṃghomukhyānāṃ dhairyaśālinām

अभ्ययाच्छंकुकर्णश्च दशकोट्या गणेश्वरः ।
दशभिः केकराक्षश्च विकृतो ष्टाभिरेव

abhyayācchaṃkukarṇaśca daśakoṭyā gaṇeśvaraḥ |
daśabhiḥ kekarākṣaśca vikṛto ṣṭābhireva

चतुःषष्ट्या विशाखश्च नवभिः पारियात्रिकः ।
षड्भिस्सर्वाङ्गको वीरस्तथैव विकृताननः

catuḥṣaṣṭyā viśākhaśca navabhiḥ pāriyātrikaḥ |
ṣaḍbhissarvāṅgako vīrastathaiva vikṛtānanaḥ

ज्वालकेशो द्वादशभिः कोटिभिर्गणपुंगवः ।
सप्तभिः समदज्जीमान् दुद्रभोष्टाभिरेव च

jvālakeśo dvādaśabhiḥ koṭibhirgaṇapuṃgavaḥ |
saptabhiḥ samadajjīmān dudrabhoṣṭābhireva ca

पंचभिश्च कपालीशः षड्भिस्संदारको गणः ।
कोटिकोटिभिरेवेह कोटिकुण्डस्तथैव च

paṃcabhiśca kapālīśaḥ ṣaḍbhissaṃdārako gaṇaḥ |
koṭikoṭibhireveha koṭikuṇḍastathaiva ca

विष्टंभोऽष्टाभिर्वीरैः कोटिभिर्गणसप्तमः ।
सहस्रकोटिभिस्तात संनादः पिप्पलस्तथा

viṣṭaṃbho'ṣṭābhirvīraiḥ koṭibhirgaṇasaptamaḥ |
sahasrakoṭibhistāta saṃnādaḥ pippalastathā

आवेशनस्तथाष्टाभिरष्टाभिश्चंद्रतापनः ।
महावेशः सहस्रेण कोटिना गणपो वृतः

āveśanastathāṣṭābhiraṣṭābhiścaṃdratāpanaḥ |
mahāveśaḥ sahasreṇa koṭinā gaṇapo vṛtaḥ

कुण्डी द्वादशकोटीभिस्तथा पर्वतको मुने ।
विनाशितुं दक्षयज्ञं निर्ययौ गणसत्तम

kuṇḍī dvādaśakoṭībhistathā parvatako mune |
vināśituṃ dakṣayajñaṃ niryayau gaṇasattama

कालश्च कालकश्चैव महाकालस्तथैव च ।
कोटीनां शतकेनैव दक्षयज्ञं ययौ प्रति

kālaśca kālakaścaiva mahākālastathaiva ca |
koṭīnāṃ śatakenaiva dakṣayajñaṃ yayau prati

अग्निकृच्छतकोट्या च कोट्याग्निमुख एव च ।
आदित्यमूर्द्धा कोट्या च तथा चैव घनावहः

agnikṛcchatakoṭyā ca koṭyāgnimukha eva ca |
ādityamūrddhā koṭyā ca tathā caiva ghanāvahaḥ

सन्नाहश्शतकोट्या च कोट्या च कुमुदो गणः ।
अमोघः कोकिलश्चैव कोटिकोट्या गणाधिपः

sannāhaśśatakoṭyā ca koṭyā ca kumudo gaṇaḥ |
amoghaḥ kokilaścaiva koṭikoṭyā gaṇādhipaḥ

काष्ठागूढश्चतुःषष्ट्या सुकेशी वृषभस्तथा ।
सुमन्त्रको गणाधीशस्तथा तात सुनिर्ययौ

kāṣṭhāgūḍhaścatuḥṣaṣṭyā sukeśī vṛṣabhastathā |
sumantrako gaṇādhīśastathā tāta suniryayau

काकपादोदरः षष्टिकोटिभिर्गणसत्तमः ।
तथा सन्तानकः षष्टिकोटिभिर्गणपुंगवः

kākapādodaraḥ ṣaṣṭikoṭibhirgaṇasattamaḥ |
tathā santānakaḥ ṣaṣṭikoṭibhirgaṇapuṃgavaḥ

महाबलश्च नवभिः कोटिभिः पुंगवस्तथा

mahābalaśca navabhiḥ koṭibhiḥ puṃgavastathā

मधुपिंगस्तथा तात गणाधीशो हि निर्ययौ ।
नीलो नवत्या कोटीनां पूर्णभद्रस्तथैव च

madhupiṃgastathā tāta gaṇādhīśo hi niryayau |
nīlo navatyā koṭīnāṃ pūrṇabhadrastathaiva ca

निर्ययौ शतकोटीभिश्चतुर्वक्त्रो गणाधिपः ।
काष्ठागूढेश्चतुष्षष्ट्या सुकेशो वृषभस्तथा

niryayau śatakoṭībhiścaturvaktro gaṇādhipaḥ |
kāṣṭhāgūḍheścatuṣṣaṣṭyā sukeśo vṛṣabhastathā

विरूपाक्षश्च कोटीनां चतुःषष्ट्या गणेश्वरः ।
तालकेतुः षडास्यश्च पंचास्यश्च गणाधिपः

virūpākṣaśca koṭīnāṃ catuḥṣaṣṭyā gaṇeśvaraḥ |
tālaketuḥ ṣaḍāsyaśca paṃcāsyaśca gaṇādhipaḥ

संवर्तकस्तथा चैव कुलीशश्च स्वयं प्रभुः ।
लोकांतकश्च दीप्तात्मा तथा दैत्यान्तको मुने

saṃvartakastathā caiva kulīśaśca svayaṃ prabhuḥ |
lokāṃtakaśca dīptātmā tathā daityāntako mune

गणो भृंगीरिटिः श्रीमान् देवदेवप्रियस्तथा ।
अशनिर्भालकश्चैव चतुःषष्ट्या सह्स्रकः

gaṇo bhṛṃgīriṭiḥ śrīmān devadevapriyastathā |
aśanirbhālakaścaiva catuḥṣaṣṭyā sahsrakaḥ

कोटिकोटिसहस्राणां शतैर्विंश तिभिर्वृतः ।
वीरेशो ह्यभ्ययाद्वीरः वीरभद्र शिवाज्ञया

koṭikoṭisahasrāṇāṃ śatairviṃśa tibhirvṛtaḥ |
vīreśo hyabhyayādvīraḥ vīrabhadra śivājñayā

भूतकोटिसहस्रैस्तु प्रययौ कोटिभिस्त्रिभिः ।
रोमजैः श्वगणै श्चैव तथा वीरो ययौ द्रुतम्

bhūtakoṭisahasraistu prayayau koṭibhistribhiḥ |
romajaiḥ śvagaṇai ścaiva tathā vīro yayau drutam

तदा भेरीमहानादः शंखाश्च विविधस्वनाः ।
जटाहरोमुखाश्चैव शृंगाणि विविधानि च

tadā bherīmahānādaḥ śaṃkhāśca vividhasvanāḥ |
jaṭāharomukhāścaiva śṛṃgāṇi vividhāni ca

ते तानि विततान्येव बंधनानि सुखानि च ।
वादित्राणि विनेदुश्च विविधानि महोत्सवे

te tāni vitatānyeva baṃdhanāni sukhāni ca |
vāditrāṇi vineduśca vividhāni mahotsave

वीरभद्रस्य यात्रायां सबलस्य महामुने ।
शकुनान्यभवंस्तत्र भूरीणि सुखदानि च

vīrabhadrasya yātrāyāṃ sabalasya mahāmune |
śakunānyabhavaṃstatra bhūrīṇi sukhadāni ca