सा॒क॒मुक्षो॑ मर्जयन्त॒ स्वसा॑रो॒ दश॒ धीर॑स्य धी॒तयो॒ धनु॑त्रीः ।
हरि॒ः पर्य॑द्रव॒ज्जाः सूर्य॑स्य॒ द्रोणं॑ ननक्षे॒ अत्यो॒ न वा॒जी
sākamukṣo marjayanta svasāro daśa dhīrasya dhītayo dhanutrīḥ |
hariḥ paryadravajjāḥ sūryasya droṇaṃ nanakṣe atyo na vājī
Mandala 9
Sukta 93: Like a calf lowing to its mothers
Rishi: नोधा गौतमः · Devata: पवमानः सोमः · Metre: त्रिष्टुप्
5 verses · 93 of 114
What happens in this chapter
Like a calf lowing to its mothers
Nodha Gautama offers five trishtubh verses to Soma Pavamana. The ten sisters, the fingers of the wise one, groom the bull together. The tawny child of the sun races to the wooden vessel. Lowing like a calf to its mothers, the bull is poured with the waters, and he goes to the kalasha with the cows as a young man goes to a maiden. The udder of the inviolable cow swells; in the bowls the cows dress his head with milk as with washed garments. Nodha asks for wealth in horses and men, long life for the praiser, and a swift coming at dawn.
सं मा॒तृभि॒र्न शिशु॑र्वावशा॒नो वृषा॑ दधन्वे पुरु॒वारो॑ अ॒द्भिः ।
मर्यो॒ न योषा॑म॒भि नि॑ष्कृ॒तं यन्सं ग॑च्छते क॒लश॑ उ॒स्रिया॑भिः
saṃ mātṛbhirna śiśurvāvaśāno vṛṣā dadhanve puruvāro adbhiḥ |
maryo na yoṣāmabhi niṣkṛtaṃ yansaṃ gacchate kalaśa usriyābhiḥ
उ॒त प्र पि॑प्य॒ ऊध॒रघ्न्या॑या॒ इन्दु॒र्धारा॑भिः सचते सुमे॒धाः ।
मू॒र्धानं॒ गाव॒ः पय॑सा च॒मूष्व॒भि श्री॑णन्ति॒ वसु॑भि॒र्न नि॒क्तैः
uta pra pipya ūdharaghnyāyā indurdhārābhiḥ sacate sumedhāḥ |
mūrdhānaṃ gāvaḥ payasā camūṣvabhi śrīṇanti vasubhirna niktaiḥ
स नो॑ दे॒वेभि॑ः पवमान र॒देन्दो॑ र॒यिम॒श्विनं॑ वावशा॒नः ।
र॒थि॒रा॒यता॑मुश॒ती पुरं॑धिरस्म॒द्र्य१॒॑गा दा॒वने॒ वसू॑नाम्
sa no devebhiḥ pavamāna radendo rayimaśvinaṃ vāvaśānaḥ |
rathirāyatāmuśatī puraṃdhirasmadryagā dāvane vasūnām
नू नो॑ र॒यिमुप॑ मास्व नृ॒वन्तं॑ पुना॒नो वा॒ताप्यं॑ वि॒श्वश्च॑न्द्रम् ।
प्र व॑न्दि॒तुरि॑न्दो ता॒र्यायु॑ः प्रा॒तर्म॒क्षू धि॒याव॑सुर्जगम्यात्
nū no rayimupa māsva nṛvantaṃ punāno vātāpyaṃ viśvaścandram |
pra vanditurindo tāryāyuḥ prātarmakṣū dhiyāvasurjagamyāt
Text source: Wikisource · CC BY-SA 4.0 (Wikisource transcription of a public-domain text)