Rishi: कश्यपो मारीचः · Devata: पवमानः सोमः · Metre: त्रिष्टुप्
6 verses · 92 of 114
Kashyapa Maricha, six trishtubh verses to Soma Pavamana. The tawny stalk is released on the filter like a chariot sent to win. Watching over men, the poet takes his name in the womb and sits in the vessels like a hotar,, and the seven seers come near. In his hidden place stand all the devas, thrice eleven; the ten fingers groom him on the fleece, and the seven great rivers. Let the truth of Pavamana stand where all singers gather: he made light for the day and helped Manu against the dasyu. He sits in the kalashas like a buffalo in the woods.
परि॑ सुवा॒नो हरि॑रं॒शुः प॒वित्रे॒ रथो॒ न स॑र्जि स॒नये॑ हिया॒नः ।
आप॒च्छ्लोक॑मिन्द्रि॒यं पू॒यमा॑न॒ः प्रति॑ दे॒वाँ अ॑जुषत॒ प्रयो॑भिः
pari suvāno hariraṃśuḥ pavitre ratho na sarji sanaye hiyānaḥ |
āpacchlokamindriyaṃ pūyamānaḥ prati devām̐ ajuṣata prayobhiḥ
अच्छा॑ नृ॒चक्षा॑ असरत्प॒वित्रे॒ नाम॒ दधा॑नः क॒विर॑स्य॒ योनौ॑ ।
सीद॒न्होते॑व॒ सद॑ने च॒मूषूपे॑मग्म॒न्नृष॑यः स॒प्त विप्रा॑ः
acchā nṛcakṣā asaratpavitre nāma dadhānaḥ kavirasya yonau |
sīdanhoteva sadane camūṣūpemagmannṛṣayaḥ sapta viprāḥ
प्र सु॑मे॒धा गा॑तु॒विद्वि॒श्वदे॑व॒ः सोम॑ः पुना॒नः सद॑ एति॒ नित्य॑म् ।
भुव॒द्विश्वे॑षु॒ काव्ये॑षु॒ रन्तानु॒ जना॑न्यतते॒ पञ्च॒ धीर॑ः
pra sumedhā gātuvidviśvadevaḥ somaḥ punānaḥ sada eti nityam |
bhuvadviśveṣu kāvyeṣu rantānu janānyatate pañca dhīraḥ
तव॒ त्ये सो॑म पवमान नि॒ण्ये विश्वे॑ दे॒वास्त्रय॑ एकाद॒शास॑ः ।
दश॑ स्व॒धाभि॒रधि॒ सानो॒ अव्ये॑ मृ॒जन्ति॑ त्वा न॒द्य॑ः स॒प्त य॒ह्वीः
tava tye soma pavamāna niṇye viśve devāstraya ekādaśāsaḥ |
daśa svadhābhiradhi sāno avye mṛjanti tvā nadyaḥ sapta yahvīḥ
तन्नु स॒त्यं पव॑मानस्यास्तु॒ यत्र॒ विश्वे॑ का॒रव॑ः सं॒नस॑न्त ।
ज्योति॒र्यदह्ने॒ अकृ॑णोदु लो॒कं प्राव॒न्मनुं॒ दस्य॑वे कर॒भीक॑म्
tannu satyaṃ pavamānasyāstu yatra viśve kāravaḥ saṃnasanta |
jyotiryadahne akṛṇodu lokaṃ prāvanmanuṃ dasyave karabhīkam
परि॒ सद्मे॑व पशु॒मान्ति॒ होता॒ राजा॒ न स॒त्यः समि॑तीरिया॒नः ।
सोम॑ः पुना॒नः क॒लशाँ॑ अयासी॒त्सीद॑न्मृ॒गो न म॑हि॒षो वने॑षु
pari sadmeva paśumānti hotā rājā na satyaḥ samitīriyānaḥ |
somaḥ punānaḥ kalaśām̐ ayāsītsīdanmṛgo na mahiṣo vaneṣu
Text source: Wikisource · CC BY-SA 4.0 (Wikisource transcription of a public-domain text)
