Rishi: वसुर्भारद्वाजः · Devata: पवमानः सोमः · Metre: जगती, ५ त्रिष्टुप्
5 verses · 81 of 114
Vasu Bharadvaja offers five verses, jagati with a closing trishtubh, to Soma Pavamana. Soma's waves go into Indra's belly; mixed with curds, the pressed drops rouse the hero to give. Like a swift steed Soma runs to the kalasha, knowing both births, of devas and of men. He is asked to scatter wealth and not to send the home far away. Then Pushan, Mitra, Varuna, Brihaspati, the Maruts, Vayu, the Ashvins, Tvashtar, Savitar, Sarasvati, Aryaman, Aditi, Bhaga and all the Vishvedevas are called to share in Pavamana.
प्र सोम॑स्य॒ पव॑मानस्यो॒र्मय॒ इन्द्र॑स्य यन्ति ज॒ठरं॑ सु॒पेश॑सः ।
द॒ध्ना यदी॒मुन्नी॑ता य॒शसा॒ गवां॑ दा॒नाय॒ शूर॑मु॒दम॑न्दिषुः सु॒ताः
pra somasya pavamānasyormaya indrasya yanti jaṭharaṃ supeśasaḥ |
dadhnā yadīmunnītā yaśasā gavāṃ dānāya śūramudamandiṣuḥ sutāḥ
अच्छा॒ हि सोम॑ः क॒लशाँ॒ असि॑ष्यद॒दत्यो॒ न वोळ्हा॑ र॒घुव॑र्तनि॒र्वृषा॑ ।
अथा॑ दे॒वाना॑मु॒भय॑स्य॒ जन्म॑नो वि॒द्वाँ अ॑श्नोत्य॒मुत॑ इ॒तश्च॒ यत्
acchā hi somaḥ kalaśām̐ asiṣyadadatyo na voḻhā raghuvartanirvṛṣā |
athā devānāmubhayasya janmano vidvām̐ aśnotyamuta itaśca yat
आ न॑ः सोम॒ पव॑मानः किरा॒ वस्विन्दो॒ भव॑ म॒घवा॒ राध॑सो म॒हः ।
शिक्षा॑ वयोधो॒ वस॑वे॒ सु चे॒तुना॒ मा नो॒ गय॑मा॒रे अ॒स्मत्परा॑ सिचः
ā naḥ soma pavamānaḥ kirā vasvindo bhava maghavā rādhaso mahaḥ |
śikṣā vayodho vasave su cetunā mā no gayamāre asmatparā sicaḥ
आ न॑ः पू॒षा पव॑मानः सुरा॒तयो॑ मि॒त्रो ग॑च्छन्तु॒ वरु॑णः स॒जोष॑सः ।
बृह॒स्पति॑र्म॒रुतो॑ वा॒युर॒श्विना॒ त्वष्टा॑ सवि॒ता सु॒यमा॒ सर॑स्वती
ā naḥ pūṣā pavamānaḥ surātayo mitro gacchantu varuṇaḥ sajoṣasaḥ |
bṛhaspatirmaruto vāyuraśvinā tvaṣṭā savitā suyamā sarasvatī
उ॒भे द्यावा॑पृथि॒वी वि॑श्वमि॒न्वे अ॑र्य॒मा दे॒वो अदि॑तिर्विधा॒ता ।
भगो॒ नृशंस॑ उ॒र्व१॒॑न्तरि॑क्षं॒ विश्वे॑ दे॒वाः पव॑मानं जुषन्त
ubhe dyāvāpṛthivī viśvaminve aryamā devo aditirvidhātā |
bhago nṛśaṃsa urvantarikṣaṃ viśve devāḥ pavamānaṃ juṣanta
Text source: Wikisource · CC BY-SA 4.0 (Wikisource transcription of a public-domain text)
