Rishi: वसुर्भारद्वाजः · Devata: पवमानः सोमः · Metre: जगती
5 verses · 80 of 114
Vasu Bharadvaja sings five jagati verses to Soma Pavamana. Soma's stream calls the devas from heaven by rita, and it flashes with the roar of Brihaspati. The inviolable cows hum their praise as the bright one climbs into his iron-hammered seat, lengthening the life of patrons. Clothed in strength, he flows into Indra's belly, playful, a bay steed. Ten fingers milk the thousand-streamed honey for the devas; pressed with stones in the waters, Soma delights Indra and the divine host, flowing like a river's wave.
सोम॑स्य॒ धारा॑ पवते नृ॒चक्ष॑स ऋ॒तेन॑ दे॒वान्ह॑वते दि॒वस्परि॑ ।
बृह॒स्पते॑ र॒वथे॑ना॒ वि दि॑द्युते समु॒द्रासो॒ न सव॑नानि विव्यचुः
somasya dhārā pavate nṛcakṣasa ṛtena devānhavate divaspari |
bṛhaspate ravathenā vi didyute samudrāso na savanāni vivyacuḥ
यं त्वा॑ वाजिन्न॒घ्न्या अ॒भ्यनू॑ष॒तायो॑हतं॒ योनि॒मा रो॑हसि द्यु॒मान् ।
म॒घोना॒मायु॑ः प्रति॒रन्महि॒ श्रव॒ इन्द्रा॑य सोम पवसे॒ वृषा॒ मद॑ः
yaṃ tvā vājinnaghnyā abhyanūṣatāyohataṃ yonimā rohasi dyumān |
maghonāmāyuḥ pratiranmahi śrava indrāya soma pavase vṛṣā madaḥ
एन्द्र॑स्य कु॒क्षा प॑वते म॒दिन्त॑म॒ ऊर्जं॒ वसा॑न॒ः श्रव॑से सुम॒ङ्गल॑ः ।
प्र॒त्यङ्स विश्वा॒ भुव॑ना॒भि प॑प्रथे॒ क्रीळ॒न्हरि॒रत्य॑ः स्यन्दते॒ वृषा॑
endrasya kukṣā pavate madintama ūrjaṃ vasānaḥ śravase sumaṅgalaḥ |
pratyaṅsa viśvā bhuvanābhi paprathe krīḻanhariratyaḥ syandate vṛṣā
तं त्वा॑ दे॒वेभ्यो॒ मधु॑मत्तमं॒ नर॑ः स॒हस्र॑धारं दुहते॒ दश॒ क्षिप॑ः ।
नृभि॑ः सोम॒ प्रच्यु॑तो॒ ग्राव॑भिः सु॒तो विश्वा॑न्दे॒वाँ आ प॑वस्वा सहस्रजित्
taṃ tvā devebhyo madhumattamaṃ naraḥ sahasradhāraṃ duhate daśa kṣipaḥ |
nṛbhiḥ soma pracyuto grāvabhiḥ suto viśvāndevām̐ ā pavasvā sahasrajit
तं त्वा॑ ह॒स्तिनो॒ मधु॑मन्त॒मद्रि॑भिर्दु॒हन्त्य॒प्सु वृ॑ष॒भं दश॒ क्षिप॑ः ।
इन्द्रं॑ सोम मा॒दय॒न्दैव्यं॒ जनं॒ सिन्धो॑रिवो॒र्मिः पव॑मानो अर्षसि
taṃ tvā hastino madhumantamadribhirduhantyapsu vṛṣabhaṃ daśa kṣipaḥ |
indraṃ soma mādayandaivyaṃ janaṃ sindhorivormiḥ pavamāno arṣasi
Text source: Wikisource · CC BY-SA 4.0 (Wikisource transcription of a public-domain text)
