Rishi: कविर्भार्गवः · Devata: पवमानः सोमः · Metre: जगती
5 verses · 79 of 114
Kavi Bhargava sings five jagati verses to Soma Pavamana. Unbidden, the bay drops run for the singers, and those who withhold gifts are asked to perish. Soma is enemy to the miser among his own and a wolf to the stranger's ill will; as thirst seizes the desert, let him seize the malicious. His highest navel is fixed in heaven, while his fingers grow on the ridge of the earth. Stones chew him on the cowhide, and the wise milk him with their hands in the waters. He is asked to crush every reviler.
अ॒चो॒दसो॑ नो धन्व॒न्त्विन्द॑व॒ः प्र सु॑वा॒नासो॑ बृ॒हद्दि॑वेषु॒ हर॑यः ।
वि च॒ नश॑न्न इ॒षो अरा॑तयो॒ऽर्यो न॑शन्त॒ सनि॑षन्त नो॒ धिय॑ः
acodaso no dhanvantvindavaḥ pra suvānāso bṛhaddiveṣu harayaḥ |
vi ca naśanna iṣo arātayo'ryo naśanta saniṣanta no dhiyaḥ
प्र णो॑ धन्व॒न्त्विन्द॑वो मद॒च्युतो॒ धना॑ वा॒ येभि॒रर्व॑तो जुनी॒मसि॑ ।
ति॒रो मर्त॑स्य॒ कस्य॑ चि॒त्परि॑ह्वृतिं व॒यं धना॑नि वि॒श्वधा॑ भरेमहि
pra ṇo dhanvantvindavo madacyuto dhanā vā yebhirarvato junīmasi |
tiro martasya kasya citparihvṛtiṃ vayaṃ dhanāni viśvadhā bharemahi
उ॒त स्वस्या॒ अरा॑त्या अ॒रिर्हि ष उ॒तान्यस्या॒ अरा॑त्या॒ वृको॒ हि षः ।
धन्व॒न्न तृष्णा॒ सम॑रीत॒ ताँ अ॒भि सोम॑ ज॒हि प॑वमान दुरा॒ध्य॑ः
uta svasyā arātyā arirhi ṣa utānyasyā arātyā vṛko hi ṣaḥ |
dhanvanna tṛṣṇā samarīta tām̐ abhi soma jahi pavamāna durādhyaḥ
दि॒वि ते॒ नाभा॑ पर॒मो य आ॑द॒दे पृ॑थि॒व्यास्ते॑ रुरुहु॒ः सान॑वि॒ क्षिप॑ः ।
अद्र॑यस्त्वा बप्सति॒ गोरधि॑ त्व॒च्य१॒॑प्सु त्वा॒ हस्तै॑र्दुदुहुर्मनी॒षिण॑ः
divi te nābhā paramo ya ādade pṛthivyāste ruruhuḥ sānavi kṣipaḥ |
adrayastvā bapsati goradhi tvacyapsu tvā hastairduduhurmanīṣiṇaḥ
ए॒वा त॑ इन्दो सु॒भ्वं॑ सु॒पेश॑सं॒ रसं॑ तुञ्जन्ति प्रथ॒मा अ॑भि॒श्रिय॑ः ।
निदं॑निदं पवमान॒ नि ता॑रिष आ॒विस्ते॒ शुष्मो॑ भवतु प्रि॒यो मद॑ः
evā ta indo subhvaṃ supeśasaṃ rasaṃ tuñjanti prathamā abhiśriyaḥ |
nidaṃnidaṃ pavamāna ni tāriṣa āviste śuṣmo bhavatu priyo madaḥ
Text source: Wikisource · CC BY-SA 4.0 (Wikisource transcription of a public-domain text)
