Sukta 62: Jamadagni's praise of the swift drops

ए॒ते अ॑सृग्र॒मिन्द॑वस्ति॒रः प॒वित्र॑मा॒शव॑ः ।
विश्वा॑न्य॒भि सौभ॑गा

ete asṛgramindavastiraḥ pavitramāśavaḥ |
viśvānyabhi saubhagā

वि॒घ्नन्तो॑ दुरि॒ता पु॒रु सु॒गा तो॒काय॑ वा॒जिन॑ः ।
तना॑ कृ॒ण्वन्तो॒ अर्व॑ते

vighnanto duritā puru sugā tokāya vājinaḥ |
tanā kṛṇvanto arvate

कृ॒ण्वन्तो॒ वरि॑वो॒ गवे॒ऽभ्य॑र्षन्ति सुष्टु॒तिम् ।
इळा॑म॒स्मभ्यं॑ सं॒यत॑म्

kṛṇvanto varivo gave'bhyarṣanti suṣṭutim |
iḻāmasmabhyaṃ saṃyatam

असा॑व्यं॒शुर्मदा॑या॒प्सु दक्षो॑ गिरि॒ष्ठाः ।
श्ये॒नो न योनि॒मास॑दत्

asāvyaṃśurmadāyāpsu dakṣo giriṣṭhāḥ |
śyeno na yonimāsadat

शु॒भ्रमन्धो॑ दे॒ववा॑तम॒प्सु धू॒तो नृभि॑ः सु॒तः ।
स्वद॑न्ति॒ गाव॒ः पयो॑भिः

śubhramandho devavātamapsu dhūto nṛbhiḥ sutaḥ |
svadanti gāvaḥ payobhiḥ

आदी॒मश्वं॒ न हेता॒रोऽशू॑शुभन्न॒मृता॑य ।
मध्वो॒ रसं॑ सध॒मादे॑

ādīmaśvaṃ na hetāro'śūśubhannamṛtāya |
madhvo rasaṃ sadhamāde

यास्ते॒ धारा॑ मधु॒श्चुतोऽसृ॑ग्रमिन्द ऊ॒तये॑ ।
ताभि॑ः प॒वित्र॒मास॑दः

yāste dhārā madhuścuto'sṛgraminda ūtaye |
tābhiḥ pavitramāsadaḥ

सो अ॒र्षेन्द्रा॑य पी॒तये॑ ति॒रो रोमा॑ण्य॒व्यया॑ ।
सीद॒न्योना॒ वने॒ष्वा

so arṣendrāya pītaye tiro romāṇyavyayā |
sīdanyonā vaneṣvā

त्वमि॑न्दो॒ परि॑ स्रव॒ स्वादि॑ष्ठो॒ अङ्गि॑रोभ्यः ।
व॒रि॒वो॒विद्घृ॒तं पय॑ः

tvamindo pari srava svādiṣṭho aṅgirobhyaḥ |
varivovidghṛtaṃ payaḥ

अ॒यं विच॑र्षणिर्हि॒तः पव॑मान॒ः स चे॑तति ।
हि॒न्वा॒न आप्यं॑ बृ॒हत्

ayaṃ vicarṣaṇirhitaḥ pavamānaḥ sa cetati |
hinvāna āpyaṃ bṛhat

ए॒ष वृषा॒ वृष॑व्रत॒ः पव॑मानो अशस्ति॒हा ।
कर॒द्वसू॑नि दा॒शुषे॑

eṣa vṛṣā vṛṣavrataḥ pavamāno aśastihā |
karadvasūni dāśuṣe

आ प॑वस्व सह॒स्रिणं॑ र॒यिं गोम॑न्तम॒श्विन॑म् ।
पु॒रु॒श्च॒न्द्रं पु॑रु॒स्पृह॑म्

ā pavasva sahasriṇaṃ rayiṃ gomantamaśvinam |
puruścandraṃ puruspṛham

ए॒ष स्य परि॑ षिच्यते मर्मृ॒ज्यमा॑न आ॒युभि॑ः ।
उ॒रु॒गा॒यः क॒विक्र॑तुः

eṣa sya pari ṣicyate marmṛjyamāna āyubhiḥ |
urugāyaḥ kavikratuḥ

स॒हस्रो॑तिः श॒ताम॑घो वि॒मानो॒ रज॑सः क॒विः ।
इन्द्रा॑य पवते॒ मद॑ः

sahasrotiḥ śatāmagho vimāno rajasaḥ kaviḥ |
indrāya pavate madaḥ

गि॒रा जा॒त इ॒ह स्तु॒त इन्दु॒रिन्द्रा॑य धीयते ।
विर्योना॑ वस॒तावि॑व

girā jāta iha stuta indurindrāya dhīyate |
viryonā vasatāviva

पव॑मानः सु॒तो नृभि॒ः सोमो॒ वाज॑मिवासरत् ।
च॒मूषु॒ शक्म॑ना॒सद॑म्

pavamānaḥ suto nṛbhiḥ somo vājamivāsarat |
camūṣu śakmanāsadam

तं त्रि॑पृ॒ष्ठे त्रि॑वन्धु॒रे रथे॑ युञ्जन्ति॒ यात॑वे ।
ऋषी॑णां स॒प्त धी॒तिभि॑ः

taṃ tripṛṣṭhe trivandhure rathe yuñjanti yātave |
ṛṣīṇāṃ sapta dhītibhiḥ

तं सो॑तारो धन॒स्पृत॑मा॒शुं वाजा॑य॒ यात॑वे ।
हरिं॑ हिनोत वा॒जिन॑म्

taṃ sotāro dhanaspṛtamāśuṃ vājāya yātave |
hariṃ hinota vājinam

आ॒वि॒शन्क॒लशं॑ सु॒तो विश्वा॒ अर्ष॑न्न॒भि श्रिय॑ः ।
शूरो॒ न गोषु॑ तिष्ठति

āviśankalaśaṃ suto viśvā arṣannabhi śriyaḥ |
śūro na goṣu tiṣṭhati

आ त॑ इन्दो॒ मदा॑य॒ कं पयो॑ दुहन्त्या॒यव॑ः ।
दे॒वा दे॒वेभ्यो॒ मधु॑

ā ta indo madāya kaṃ payo duhantyāyavaḥ |
devā devebhyo madhu

आ न॒ः सोमं॑ प॒वित्र॒ आ सृ॒जता॒ मधु॑मत्तमम् ।
दे॒वेभ्यो॑ देव॒श्रुत्त॑मम्

ā naḥ somaṃ pavitra ā sṛjatā madhumattamam |
devebhyo devaśruttamam

ए॒ते सोमा॑ असृक्षत गृणा॒नाः श्रव॑से म॒हे ।
म॒दिन्त॑मस्य॒ धार॑या

ete somā asṛkṣata gṛṇānāḥ śravase mahe |
madintamasya dhārayā

अ॒भि गव्या॑नि वी॒तये॑ नृ॒म्णा पु॑ना॒नो अ॑र्षसि ।
स॒नद्वा॑ज॒ः परि॑ स्रव

abhi gavyāni vītaye nṛmṇā punāno arṣasi |
sanadvājaḥ pari srava

उ॒त नो॒ गोम॑ती॒रिषो॒ विश्वा॑ अर्ष परि॒ष्टुभ॑ः ।
गृ॒णा॒नो ज॒मद॑ग्निना

uta no gomatīriṣo viśvā arṣa pariṣṭubhaḥ |
gṛṇāno jamadagninā

पव॑स्व वा॒चो अ॑ग्रि॒यः सोम॑ चि॒त्राभि॑रू॒तिभि॑ः ।
अ॒भि विश्वा॑नि॒ काव्या॑

pavasva vāco agriyaḥ soma citrābhirūtibhiḥ |
abhi viśvāni kāvyā

त्वं स॑मु॒द्रिया॑ अ॒पो॑ऽग्रि॒यो वाच॑ ई॒रय॑न् ।
पव॑स्व विश्वमेजय

tvaṃ samudriyā apo'griyo vāca īrayan |
pavasva viśvamejaya

तुभ्ये॒मा भुव॑ना कवे महि॒म्ने सो॑म तस्थिरे ।
तुभ्य॑मर्षन्ति॒ सिन्ध॑वः

tubhyemā bhuvanā kave mahimne soma tasthire |
tubhyamarṣanti sindhavaḥ

प्र ते॑ दि॒वो न वृ॒ष्टयो॒ धारा॑ यन्त्यस॒श्चत॑ः ।
अ॒भि शु॒क्रामु॑प॒स्तिर॑म्

pra te divo na vṛṣṭayo dhārā yantyasaścataḥ |
abhi śukrāmupastiram

इन्द्रा॒येन्दुं॑ पुनीतनो॒ग्रं दक्षा॑य॒ साध॑नम् ।
ई॒शा॒नं वी॒तिरा॑धसम्

indrāyenduṃ punītanograṃ dakṣāya sādhanam |
īśānaṃ vītirādhasam

पव॑मान ऋ॒तः क॒विः सोम॑ः प॒वित्र॒मास॑दत् ।
दध॑त्स्तो॒त्रे सु॒वीर्य॑म्

pavamāna ṛtaḥ kaviḥ somaḥ pavitramāsadat |
dadhatstotre suvīryam