आ त्वा॒ गिरो॑ र॒थीरि॒वास्थु॑ः सु॒तेषु॑ गिर्वणः ।
अ॒भि त्वा॒ सम॑नूष॒तेन्द्र॑ व॒त्सं न मा॒तर॑ः
ā tvā giro rathīrivāsthuḥ suteṣu girvaṇaḥ |
abhi tvā samanūṣatendra vatsaṃ na mātaraḥ
Mandala 8
Sukta 95: Praise the pure Indra with pure song
Rishi: तिरश्चिराङ्गिरसः · Devata: इन्द्रः · Metre: अनुष्टुप्
9 verses · 95 of 103
What happens in this chapter
Praise the pure Indra with pure song
Tirashchi Angirasa says the songs have mounted to Indra like charioteers; they have lowed to him as mothers to a calf. Drink the bright Soma the falcon brought; you are king and lord of all the clans. Hear the call of Tirashchi, who serves you; fill him with riches of heroes and cattle. He has brought forth a new and gladdening song, an old thought of rita, swelling with wisdom. The last three verses ring with one word, shuddha, pure: let us praise the pure Indra with a pure saman; come pure with pure help; pure, you give treasures to the giver, slay the foes and win the prize.
आ त्वा॑ शु॒क्रा अ॑चुच्यवुः सु॒तास॑ इन्द्र गिर्वणः ।
पिबा॒ त्व१॒॑स्यान्ध॑स॒ इन्द्र॒ विश्वा॑सु ते हि॒तम्
ā tvā śukrā acucyavuḥ sutāsa indra girvaṇaḥ |
pibā tvasyāndhasa indra viśvāsu te hitam
पिबा॒ सोमं॒ मदा॑य॒ कमिन्द्र॑ श्ये॒नाभृ॑तं सु॒तम् ।
त्वं हि शश्व॑तीनां॒ पती॒ राजा॑ वि॒शामसि॑
pibā somaṃ madāya kamindra śyenābhṛtaṃ sutam |
tvaṃ hi śaśvatīnāṃ patī rājā viśāmasi
श्रु॒धी हवं॑ तिर॒श्च्या इन्द्र॒ यस्त्वा॑ सप॒र्यति॑ ।
सु॒वीर्य॑स्य॒ गोम॑तो रा॒यस्पू॑र्धि म॒हाँ अ॑सि
śrudhī havaṃ tiraścyā indra yastvā saparyati |
suvīryasya gomato rāyaspūrdhi mahām̐ asi
इन्द्र॒ यस्ते॒ नवी॑यसीं॒ गिरं॑ म॒न्द्रामजी॑जनत् ।
चि॒कि॒त्विन्म॑नसं॒ धियं॑ प्र॒त्नामृ॒तस्य॑ पि॒प्युषी॑म्
indra yaste navīyasīṃ giraṃ mandrāmajījanat |
cikitvinmanasaṃ dhiyaṃ pratnāmṛtasya pipyuṣīm
तमु॑ ष्टवाम॒ यं गिर॒ इन्द्र॑मु॒क्थानि॑ वावृ॒धुः ।
पु॒रूण्य॑स्य॒ पौंस्या॒ सिषा॑सन्तो वनामहे
tamu ṣṭavāma yaṃ gira indramukthāni vāvṛdhuḥ |
purūṇyasya pauṃsyā siṣāsanto vanāmahe
एतो॒ न्विन्द्रं॒ स्तवा॑म शु॒द्धं शु॒द्धेन॒ साम्ना॑ ।
शु॒द्धैरु॒क्थैर्वा॑वृ॒ध्वांसं॑ शु॒द्ध आ॒शीर्वा॑न्ममत्तु
eto nvindraṃ stavāma śuddhaṃ śuddhena sāmnā |
śuddhairukthairvāvṛdhvāṃsaṃ śuddha āśīrvānmamattu
इन्द्र॑ शु॒द्धो न॒ आ ग॑हि शु॒द्धः शु॒द्धाभि॑रू॒तिभि॑ः ।
शु॒द्धो र॒यिं नि धा॑रय शु॒द्धो म॑मद्धि सो॒म्यः
indra śuddho na ā gahi śuddhaḥ śuddhābhirūtibhiḥ |
śuddho rayiṃ ni dhāraya śuddho mamaddhi somyaḥ
इन्द्र॑ शु॒द्धो हि नो॑ र॒यिं शु॒द्धो रत्ना॑नि दा॒शुषे॑ ।
शु॒द्धो वृ॒त्राणि॑ जिघ्नसे शु॒द्धो वाजं॑ सिषाससि
indra śuddho hi no rayiṃ śuddho ratnāni dāśuṣe |
śuddho vṛtrāṇi jighnase śuddho vājaṃ siṣāsasi
Text source: Wikisource · CC BY-SA 4.0 (Wikisource transcription of a public-domain text)