Mandala 8

Sukta 89: Indra spread the earth, propped heaven

Rishi: नृमेध- पुरुमेधावाङ्गिरसौ · Devata: इन्द्रः · Metre: १-४ प्रगाथः - विषमा बृहती, समा सतोबृहती, ५-६ अनुष्टुप्, ७ बृहती

7 verses · 89 of 103

What happens in this chapter

Indra spread the earth, propped heaven

Nrimedha and Purumedha Angirasa call the Maruts to sing a great song to Indra, best slayer of Vritra, by which the keepers of rita brought forth light, the wakeful god for the god. Indra blew away curses and became glorious; the gods sought his friendship. The vajra of a hundred joints strikes Vritra. Let the mother waters flow; slay Vritra and win the light. When you were born, Maghavan, peerless, to slay Vritra, you spread out the earth and propped up the sky. From you the yajna was born and the song of praise. You set the cooked milk in the raw cows and raised the Sun into heaven.

89.1

बृ॒हदिन्द्रा॑य गायत॒ मरु॑तो वृत्र॒हन्त॑मम् ।
येन॒ ज्योति॒रज॑नयन्नृता॒वृधो॑ दे॒वं दे॒वाय॒ जागृ॑वि

bṛhadindrāya gāyata maruto vṛtrahantamam |
yena jyotirajanayannṛtāvṛdho devaṃ devāya jāgṛvi

89.2

अपा॑धमद॒भिश॑स्तीरशस्ति॒हाथेन्द्रो॑ द्यु॒म्न्याभ॑वत् ।
दे॒वास्त॑ इन्द्र स॒ख्याय॑ येमिरे॒ बृह॑द्भानो॒ मरु॑द्गण

apādhamadabhiśastīraśastihāthendro dyumnyābhavat |
devāsta indra sakhyāya yemire bṛhadbhāno marudgaṇa

89.3

प्र व॒ इन्द्रा॑य बृह॒ते मरु॑तो॒ ब्रह्मा॑र्चत ।
वृ॒त्रं ह॑नति वृत्र॒हा श॒तक्र॑तु॒र्वज्रे॑ण श॒तप॑र्वणा

pra va indrāya bṛhate maruto brahmārcata |
vṛtraṃ hanati vṛtrahā śatakraturvajreṇa śataparvaṇā

89.4

अ॒भि प्र भ॑र धृष॒ता धृ॑षन्मन॒ः श्रव॑श्चित्ते असद्बृ॒हत् ।
अर्ष॒न्त्वापो॒ जव॑सा॒ वि मा॒तरो॒ हनो॑ वृ॒त्रं जया॒ स्व॑ः

abhi pra bhara dhṛṣatā dhṛṣanmanaḥ śravaścitte asadbṛhat |
arṣantvāpo javasā vi mātaro hano vṛtraṃ jayā svaḥ

89.5

यज्जाय॑था अपूर्व्य॒ मघ॑वन्वृत्र॒हत्या॑य ।
तत्पृ॑थि॒वीम॑प्रथय॒स्तद॑स्तभ्ना उ॒त द्याम्

yajjāyathā apūrvya maghavanvṛtrahatyāya |
tatpṛthivīmaprathayastadastabhnā uta dyām

89.6

तत्ते॑ य॒ज्ञो अ॑जायत॒ तद॒र्क उ॒त हस्कृ॑तिः ।
तद्विश्व॑मभि॒भूर॑सि॒ यज्जा॒तं यच्च॒ जन्त्व॑म्

tatte yajño ajāyata tadarka uta haskṛtiḥ |
tadviśvamabhibhūrasi yajjātaṃ yacca jantvam

89.7

आ॒मासु॑ प॒क्वमैर॑य॒ आ सूर्यं॑ रोहयो दि॒वि ।
घ॒र्मं न साम॑न्तपता सुवृ॒क्तिभि॒र्जुष्टं॒ गिर्व॑णसे बृ॒हत्

āmāsu pakvamairaya ā sūryaṃ rohayo divi |
gharmaṃ na sāmantapatā suvṛktibhirjuṣṭaṃ girvaṇase bṛhat

Text source: Wikisource · CC BY-SA 4.0 (Wikisource transcription of a public-domain text)