Rishi: कृष्ण आङ्गिरसः, विश्वको वा कार्ष्णिः · Devata: अश्विनौ · Metre: जगती
5 verses · 86 of 103
The sukta is ascribed to Krishna Angirasa or to his son Vishvaka Karshni. The Ashvins are wonder-workers, healers who bring joy. Vishvaka calls them for the sake of his offspring, and every verse closes with one plea: do not part us from your friendship, do not let us go. How can a troubled man praise you rightly? You gave him the insight to seek good. You once gave this man back Vishnapu, the son he had lost. The rishi calls the hero who wins wealth, whose kindness is sweet as a father's. The last verse sings of rita: by rita Savita has toiled, the horn of rita spreads wide.
उ॒भा हि द॒स्रा भि॒षजा॑ मयो॒भुवो॒भा दक्ष॑स्य॒ वच॑सो बभू॒वथु॑ः ।
ता वां॒ विश्व॑को हवते तनूकृ॒थे मा नो॒ वि यौ॑ष्टं स॒ख्या मु॒मोच॑तम्
ubhā hi dasrā bhiṣajā mayobhuvobhā dakṣasya vacaso babhūvathuḥ |
tā vāṃ viśvako havate tanūkṛthe mā no vi yauṣṭaṃ sakhyā mumocatam
क॒था नू॒नं वां॒ विम॑ना॒ उप॑ स्तवद्यु॒वं धियं॑ ददथु॒र्वस्य॑इष्टये ।
ता वां॒ विश्व॑को हवते तनूकृ॒थे मा नो॒ वि यौ॑ष्टं स॒ख्या मु॒मोच॑तम्
kathā nūnaṃ vāṃ vimanā upa stavadyuvaṃ dhiyaṃ dadathurvasyaiṣṭaye |
tā vāṃ viśvako havate tanūkṛthe mā no vi yauṣṭaṃ sakhyā mumocatam
यु॒वं हि ष्मा॑ पुरुभुजे॒ममे॑ध॒तुं वि॑ष्णा॒प्वे॑ द॒दथु॒र्वस्य॑इष्टये ।
ता वां॒ विश्व॑को हवते तनूकृ॒थे मा नो॒ वि यौ॑ष्टं स॒ख्या मु॒मोच॑तम्
yuvaṃ hi ṣmā purubhujemamedhatuṃ viṣṇāpve dadathurvasyaiṣṭaye |
tā vāṃ viśvako havate tanūkṛthe mā no vi yauṣṭaṃ sakhyā mumocatam
उ॒त त्यं वी॒रं ध॑न॒सामृ॑जी॒षिणं॑ दू॒रे चि॒त्सन्त॒मव॑से हवामहे ।
यस्य॒ स्वादि॑ष्ठा सुम॒तिः पि॒तुर्य॑था॒ मा नो॒ वि यौ॑ष्टं स॒ख्या मु॒मोच॑तम्
uta tyaṃ vīraṃ dhanasāmṛjīṣiṇaṃ dūre citsantamavase havāmahe |
yasya svādiṣṭhā sumatiḥ pituryathā mā no vi yauṣṭaṃ sakhyā mumocatam
ऋ॒तेन॑ दे॒वः स॑वि॒ता श॑मायत ऋ॒तस्य॒ शृङ्ग॑मुर्वि॒या वि प॑प्रथे ।
ऋ॒तं सा॑साह॒ महि॑ चित्पृतन्य॒तो मा नो॒ वि यौ॑ष्टं स॒ख्या मु॒मोच॑तम्
ṛtena devaḥ savitā śamāyata ṛtasya śṛṅgamurviyā vi paprathe |
ṛtaṃ sāsāha mahi citpṛtanyato mā no vi yauṣṭaṃ sakhyā mumocatam
Text source: Wikisource · CC BY-SA 4.0 (Wikisource transcription of a public-domain text)
