स पू॒र्व्यो म॒हानां॑ वे॒नः क्रतु॑भिरानजे ।
यस्य॒ द्वारा॒ मनु॑ष्पि॒ता दे॒वेषु॒ धिय॑ आन॒जे
sa pūrvyo mahānāṃ venaḥ kratubhirānaje |
yasya dvārā manuṣpitā deveṣu dhiya ānaje
Mandala 8
Sukta 63: Indra opened the cows for the Angirases
Rishi: प्रगाथः काण्वः · Devata: इन्द्रः, १२ देवाः · Metre: १, ४-५, ७ अनुष्टुप्, १२ त्रिष्टुप्
12 verses · 63 of 103
What happens in this chapter
Indra opened the cows for the Angirases
Pragatha Kanva sings Indra, the ancient seer of the great ones, through whose doors Manu, the father, brought prayers to the gods. Knowing the way, Indra uncovered the cows for the Angirases; the rishi praises that deed of manhood. All mighty deeds done and still to be done rest in Indra. When the five peoples raised their shouts to him, he struck down the proud foe. The last verse, in trishtubh, calls the Rudras, the bounteous mountains and all the gods, led by Indra, to help us in the battle with Vritra.
दि॒वो मानं॒ नोत्स॑द॒न्सोम॑पृष्ठासो॒ अद्र॑यः ।
उ॒क्था ब्रह्म॑ च॒ शंस्या॑
divo mānaṃ notsadansomapṛṣṭhāso adrayaḥ |
ukthā brahma ca śaṃsyā
स वि॒द्वाँ अङ्गि॑रोभ्य॒ इन्द्रो॒ गा अ॑वृणो॒दप॑ ।
स्तु॒षे तद॑स्य॒ पौंस्य॑म्
sa vidvām̐ aṅgirobhya indro gā avṛṇodapa |
stuṣe tadasya pauṃsyam
स प्र॒त्नथा॑ कविवृ॒ध इन्द्रो॑ वा॒कस्य॑ व॒क्षणि॑ः ।
शि॒वो अ॒र्कस्य॒ होम॑न्यस्म॒त्रा ग॒न्त्वव॑से
sa pratnathā kavivṛdha indro vākasya vakṣaṇiḥ |
śivo arkasya homanyasmatrā gantvavase
आदू॒ नु ते॒ अनु॒ क्रतुं॒ स्वाहा॒ वर॑स्य॒ यज्य॑वः ।
श्वा॒त्रम॒र्का अ॑नूष॒तेन्द्र॑ गो॒त्रस्य॑ दा॒वने॑
ādū nu te anu kratuṃ svāhā varasya yajyavaḥ |
śvātramarkā anūṣatendra gotrasya dāvane
इन्द्रे॒ विश्वा॑नि वी॒र्या॑ कृ॒तानि॒ कर्त्वा॑नि च ।
यम॒र्का अ॑ध्व॒रं वि॒दुः
indre viśvāni vīryā kṛtāni kartvāni ca |
yamarkā adhvaraṃ viduḥ
यत्पाञ्च॑जन्यया वि॒शेन्द्रे॒ घोषा॒ असृ॑क्षत ।
अस्तृ॑णाद्ब॒र्हणा॑ वि॒पो॒३॒॑ऽर्यो मान॑स्य॒ स क्षय॑ः
yatpāñcajanyayā viśendre ghoṣā asṛkṣata |
astṛṇādbarhaṇā vipo'ryo mānasya sa kṣayaḥ
इ॒यमु॑ ते॒ अनु॑ष्टुतिश्चकृ॒षे तानि॒ पौंस्या॑ ।
प्राव॑श्च॒क्रस्य॑ वर्त॒निम्
iyamu te anuṣṭutiścakṛṣe tāni pauṃsyā |
prāvaścakrasya vartanim
अ॒स्य वृष्णो॒ व्योद॑न उ॒रु क्र॑मिष्ट जी॒वसे॑ ।
यवं॒ न प॒श्व आ द॑दे
asya vṛṣṇo vyodana uru kramiṣṭa jīvase |
yavaṃ na paśva ā dade
तद्दधा॑ना अव॒स्यवो॑ यु॒ष्माभि॒र्दक्ष॑पितरः ।
स्याम॑ म॒रुत्व॑तो वृ॒धे
taddadhānā avasyavo yuṣmābhirdakṣapitaraḥ |
syāma marutvato vṛdhe
बळृ॒त्विया॑य॒ धाम्न॒ ऋक्व॑भिः शूर नोनुमः ।
जेषा॑मेन्द्र॒ त्वया॑ यु॒जा
baḻṛtviyāya dhāmna ṛkvabhiḥ śūra nonumaḥ |
jeṣāmendra tvayā yujā
अ॒स्मे रु॒द्रा मे॒हना॒ पर्व॑तासो वृत्र॒हत्ये॒ भर॑हूतौ स॒जोषा॑ः ।
यः शंस॑ते स्तुव॒ते धायि॑ प॒ज्र इन्द्र॑ज्येष्ठा अ॒स्माँ अ॑वन्तु दे॒वाः
asme rudrā mehanā parvatāso vṛtrahatye bharahūtau sajoṣāḥ |
yaḥ śaṃsate stuvate dhāyi pajra indrajyeṣṭhā asmām̐ avantu devāḥ
Text source: Wikisource · CC BY-SA 4.0 (Wikisource transcription of a public-domain text)