उ॒प॒मं त्वा॑ म॒घोनां॒ ज्येष्ठं॑ च वृष॒भाणा॑म् ।
पू॒र्भित्त॑मं मघवन्निन्द्र गो॒विद॒मीशा॑नं रा॒य ई॑महे
upamaṃ tvā maghonāṃ jyeṣṭhaṃ ca vṛṣabhāṇām |
pūrbhittamaṃ maghavannindra govidamīśānaṃ rāya īmahe
Mandala 8
Sukta 53: Fifth Valakhilya: Medhya seeks the nearest Indra
Rishi: मेध्यः काण्वः · Devata: इन्द्रः · Metre: प्रगाथः
8 verses · 53 of 103
What happens in this chapter
Fifth Valakhilya: Medhya seeks the nearest Indra
Medhya Kanva sings the fifth Valakhilya sukta in pragatha. Indra is the highest of the bountiful, eldest of bulls, the greatest breaker of forts, finder of cows, lord of wealth. Growing day by day, he subdued Ayu, Kutsa and Atithigva. Let the pressing stones pour the honey of all peoples, far and near, into him. The rishi asks Indra to come nearer with measured aid, the most kindly with kindest help, a good kinsman with good kin, and to strike every hatred. Longing for strength, the singer goes to the contest with his prayer, wanting horses and cows, and calls Indra first at the churning of battle.
य आ॒युं कुत्स॑मतिथि॒ग्वमर्द॑यो वावृधा॒नो दि॒वेदि॑वे ।
तं त्वा॑ व॒यं हर्य॑श्वं श॒तक्र॑तुं वाज॒यन्तो॑ हवामहे
ya āyuṃ kutsamatithigvamardayo vāvṛdhāno divedive |
taṃ tvā vayaṃ haryaśvaṃ śatakratuṃ vājayanto havāmahe
आ नो॒ विश्वे॑षां॒ रसं॒ मध्व॑ः सिञ्च॒न्त्वद्र॑यः ।
ये प॑रा॒वति॑ सुन्वि॒रे जने॒ष्वा ये अ॑र्वा॒वतीन्द॑वः
ā no viśveṣāṃ rasaṃ madhvaḥ siñcantvadrayaḥ |
ye parāvati sunvire janeṣvā ye arvāvatīndavaḥ
विश्वा॒ द्वेषां॑सि ज॒हि चाव॒ चा कृ॑धि॒ विश्वे॑ सन्व॒न्त्वा वसु॑ ।
शीष्टे॑षु चित्ते मदि॒रासो॑ अं॒शवो॒ यत्रा॒ सोम॑स्य तृ॒म्पसि॑
viśvā dveṣāṃsi jahi cāva cā kṛdhi viśve sanvantvā vasu |
śīṣṭeṣu citte madirāso aṃśavo yatrā somasya tṛmpasi
इन्द्र॒ नेदी॑य॒ एदि॑हि मि॒तमे॑धाभिरू॒तिभि॑ः ।
आ शं॑तम॒ शंत॑माभिर॒भिष्टि॑भि॒रा स्वा॑पे स्वा॒पिभि॑ः
indra nedīya edihi mitamedhābhirūtibhiḥ |
ā śaṃtama śaṃtamābhirabhiṣṭibhirā svāpe svāpibhiḥ
आ॒जि॒तुरं॒ सत्प॑तिं वि॒श्वच॑र्षणिं कृ॒धि प्र॒जास्वाभ॑गम् ।
प्र सू ति॑रा॒ शची॑भि॒र्ये त॑ उ॒क्थिन॒ः क्रतुं॑ पुन॒त आ॑नु॒षक्
ājituraṃ satpatiṃ viśvacarṣaṇiṃ kṛdhi prajāsvābhagam |
pra sū tirā śacībhirye ta ukthinaḥ kratuṃ punata ānuṣak
यस्ते॒ साधि॒ष्ठोऽव॑से॒ ते स्या॑म॒ भरे॑षु ते ।
व॒यं होत्रा॑भिरु॒त दे॒वहू॑तिभिः सस॒वांसो॑ मनामहे
yaste sādhiṣṭho'vase te syāma bhareṣu te |
vayaṃ hotrābhiruta devahūtibhiḥ sasavāṃso manāmahe
अ॒हं हि ते॑ हरिवो॒ ब्रह्म॑ वाज॒युरा॒जिं यामि॒ सदो॒तिभि॑ः ।
त्वामिदे॒व तममे॒ सम॑श्व॒युर्ग॒व्युरग्रे॑ मथी॒नाम्
ahaṃ hi te harivo brahma vājayurājiṃ yāmi sadotibhiḥ |
tvāmideva tamame samaśvayurgavyuragre mathīnām
Text source: Wikisource · CC BY-SA 4.0 (Wikisource transcription of a public-domain text)