अता॑रिष्म॒ तम॑सस्पा॒रम॒स्य प्रति॒ स्तोमं॑ देव॒यन्तो॒ दधा॑नाः ।
पु॒रु॒दंसा॑ पुरु॒तमा॑ पुरा॒जाम॑र्त्या हवते अ॒श्विना॒ गीः
atāriṣma tamasaspāramasya prati stomaṃ devayanto dadhānāḥ |
purudaṃsā purutamā purājāmartyā havate aśvinā gīḥ
Mandala 7
Sukta 73: Across the darkness to the Ashvins
Rishi: मैत्रावरुणिर्वसिष्ठः · Devata: अश्विनौ · Metre: त्रिष्टुप्
5 verses · 73 of 104
What happens in this chapter
Across the darkness to the Ashvins
We have crossed to the far shore of this darkness, says Maharshi Vasishtha, bringing our praise to the Ashvins, wonder-working, born of old, immortal. The beloved hotar of men is seated. Vasishtha, sent like a messenger, wakes with hymns to greet them. He calls the two who slay rakshasas, strong of hand, to come to his people with blessing and not to harm them; the cheering soma drinks are gathered. The close repeats the call to come from every side with the wealth of the five peoples.
न्यु॑ प्रि॒यो मनु॑षः सादि॒ होता॒ नास॑त्या॒ यो यज॑ते॒ वन्द॑ते च ।
अ॒श्नी॒तं मध्वो॑ अश्विना उपा॒क आ वां॑ वोचे वि॒दथे॑षु॒ प्रय॑स्वान्
nyu priyo manuṣaḥ sādi hotā nāsatyā yo yajate vandate ca |
aśnītaṃ madhvo aśvinā upāka ā vāṃ voce vidatheṣu prayasvān
अहे॑म य॒ज्ञं प॒थामु॑रा॒णा इ॒मां सु॑वृ॒क्तिं वृ॑षणा जुषेथाम् ।
श्रु॒ष्टी॒वेव॒ प्रेषि॑तो वामबोधि॒ प्रति॒ स्तोमै॒र्जर॑माणो॒ वसि॑ष्ठः
ahema yajñaṃ pathāmurāṇā imāṃ suvṛktiṃ vṛṣaṇā juṣethām |
śruṣṭīveva preṣito vāmabodhi prati stomairjaramāṇo vasiṣṭhaḥ
उप॒ त्या वह्नी॑ गमतो॒ विशं॑ नो रक्षो॒हणा॒ सम्भृ॑ता वी॒ळुपा॑णी ।
समन्धां॑स्यग्मत मत्स॒राणि॒ मा नो॑ मर्धिष्ट॒मा ग॑तं शि॒वेन॑
upa tyā vahnī gamato viśaṃ no rakṣohaṇā sambhṛtā vīḻupāṇī |
samandhāṃsyagmata matsarāṇi mā no mardhiṣṭamā gataṃ śivena
आ प॒श्चाता॑न्नास॒त्या पु॒रस्ता॒दाश्वि॑ना यातमध॒रादुद॑क्तात् ।
आ वि॒श्वत॒ः पाञ्च॑जन्येन रा॒या यू॒यं पा॑त स्व॒स्तिभि॒ः सदा॑ नः
ā paścātānnāsatyā purastādāśvinā yātamadharādudaktāt |
ā viśvataḥ pāñcajanyena rāyā yūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)