Rishi: मैत्रावरुणिर्वसिष्ठः · Devata: मित्रावरुणौ · Metre: त्रिष्टुप्
5 verses · 64 of 104
Five trishtubh verses of Maharshi Vasishtha to Mitra and Varuna, who dwell in heaven and rule over earth. Let the robes of ghee be poured for them. He calls the two kings, guardians of great Rta and lords of the rivers, to come near and send refreshment and rain from the sky. Let them lead us by the straightest paths, so that King Sudas may say we rejoice under the Devas' protection. He compares his hymn to a seat fashioned with care and offers it with pure soma.
दि॒वि क्षय॑न्ता॒ रज॑सः पृथि॒व्यां प्र वां॑ घृ॒तस्य॑ नि॒र्णिजो॑ ददीरन् ।
ह॒व्यं नो॑ मि॒त्रो अ॑र्य॒मा सुजा॑तो॒ राजा॑ सुक्ष॒त्रो वरु॑णो जुषन्त
divi kṣayantā rajasaḥ pṛthivyāṃ pra vāṃ ghṛtasya nirṇijo dadīran |
havyaṃ no mitro aryamā sujāto rājā sukṣatro varuṇo juṣanta
आ रा॑जाना मह ऋतस्य गोपा॒ सिन्धु॑पती क्षत्रिया यातम॒र्वाक् ।
इळां॑ नो मित्रावरुणो॒त वृ॒ष्टिमव॑ दि॒व इ॑न्वतं जीरदानू
ā rājānā maha ṛtasya gopā sindhupatī kṣatriyā yātamarvāk |
iḻāṃ no mitrāvaruṇota vṛṣṭimava diva invataṃ jīradānū
मि॒त्रस्तन्नो॒ वरु॑णो दे॒वो अ॒र्यः प्र साधि॑ष्ठेभिः प॒थिभि॑र्नयन्तु ।
ब्रव॒द्यथा॑ न॒ आद॒रिः सु॒दास॑ इ॒षा म॑देम स॒ह दे॒वगो॑पाः
mitrastanno varuṇo devo aryaḥ pra sādhiṣṭhebhiḥ pathibhirnayantu |
bravadyathā na ādariḥ sudāsa iṣā madema saha devagopāḥ
यो वां॒ गर्तं॒ मन॑सा॒ तक्ष॑दे॒तमू॒र्ध्वां धी॒तिं कृ॒णव॑द्धा॒रय॑च्च ।
उ॒क्षेथां॑ मित्रावरुणा घृ॒तेन॒ ता रा॑जाना सुक्षि॒तीस्त॑र्पयेथाम्
yo vāṃ gartaṃ manasā takṣadetamūrdhvāṃ dhītiṃ kṛṇavaddhārayacca |
ukṣethāṃ mitrāvaruṇā ghṛtena tā rājānā sukṣitīstarpayethām
ए॒ष स्तोमो॑ वरुण मित्र॒ तुभ्यं॒ सोम॑ः शु॒क्रो न वा॒यवे॑ऽयामि ।
अ॒वि॒ष्टं धियो॑ जिगृ॒तं पुरं॑धीर्यू॒यं पा॑त स्व॒स्तिभि॒ः सदा॑ नः
eṣa stomo varuṇa mitra tubhyaṃ somaḥ śukro na vāyave'yāmi |
aviṣṭaṃ dhiyo jigṛtaṃ puraṃdhīryūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)
