Rishi: मैत्रावरुणिर्वसिष्ठः · Devata: रुद्रः · Metre: जगती, ४ त्रिष्टुप्
4 verses · 46 of 104
Vasishtha brings these songs to Rudra of the steady bow and swift arrows, the self-ruling god, unconquered, the conqueror, the disposer with sharp weapons; may he hear. Rudra knows the earthly race by his dwelling and the heavenly by his sovereignty. 'Guard those who guard us, come to our doors, and be free of sickness among our people.' The rishi asks that the bright shaft Rudra hurls from heaven, which roams the earth, pass us by. 'Yours are a thousand remedies, gentle one; do not harm our children and grandchildren. Do not strike us, Rudra, do not abandon us; may we not fall into your noose when you are angered.'
इ॒मा रु॒द्राय॑ स्थि॒रध॑न्वने॒ गिर॑ः क्षि॒प्रेष॑वे दे॒वाय॑ स्व॒धाव्ने॑ ।
अषा॑ळ्हाय॒ सह॑मानाय वे॒धसे॑ ति॒ग्मायु॑धाय भरता शृ॒णोतु॑ नः
imā rudrāya sthiradhanvane giraḥ kṣipreṣave devāya svadhāvne |
aṣāḻhāya sahamānāya vedhase tigmāyudhāya bharatā śṛṇotu naḥ
स हि क्षये॑ण॒ क्षम्य॑स्य॒ जन्म॑न॒ः साम्रा॑ज्येन दि॒व्यस्य॒ चेत॑ति ।
अव॒न्नव॑न्ती॒रुप॑ नो॒ दुर॑श्चरानमी॒वो रु॑द्र॒ जासु॑ नो भव
sa hi kṣayeṇa kṣamyasya janmanaḥ sāmrājyena divyasya cetati |
avannavantīrupa no duraścarānamīvo rudra jāsu no bhava
या ते॑ दि॒द्युदव॑सृष्टा दि॒वस्परि॑ क्ष्म॒या चर॑ति॒ परि॒ सा वृ॑णक्तु नः ।
स॒हस्रं॑ ते स्वपिवात भेष॒जा मा न॑स्तो॒केषु॒ तन॑येषु रीरिषः
yā te didyudavasṛṣṭā divaspari kṣmayā carati pari sā vṛṇaktu naḥ |
sahasraṃ te svapivāta bheṣajā mā nastokeṣu tanayeṣu rīriṣaḥ
मा नो॑ वधी रुद्र॒ मा परा॑ दा॒ मा ते॑ भूम॒ प्रसि॑तौ हीळि॒तस्य॑ ।
आ नो॑ भज ब॒र्हिषि॑ जीवशं॒से यू॒यं पा॑त स्व॒स्तिभि॒ः सदा॑ नः
mā no vadhī rudra mā parā dā mā te bhūma prasitau hīḻitasya |
ā no bhaja barhiṣi jīvaśaṃse yūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)
