Rishi: मैत्रावरुणिर्वसिष्ठः · Devata: दधिक्राः, १ दधिक्राश्व्युषोऽग्निर्भगेन्द्रविष्णुपूषब्रह्मणस्पत्यादित्यद्यावापृथिव्यापः · Metre: त्रिष्टुप्, १ जगती
5 verses · 44 of 104
Vasishtha calls first on Dadhikra, the divine horse, then the Ashvins, Dawn, kindled Agni and Bhaga, with Indra, Vishnu, Pushan, Brahmanaspati, the Adityas, heaven and earth, the waters and the sun. Waking Dadhikra with homage, the priests seat goddess Ila on the grass. On waking Dadhikra he speaks to Agni, Dawn, the sun and the cow, and to the tawny steed of Varuna, asking them to keep all troubles far. Dadhikra is the first prize-winning courser, leading the chariots, in accord with Dawn, the sun, the Adityas, Vasus and Angirases. Let him anoint our road to follow the path of rita, and let Agni and all the wise gods hear.
द॒धि॒क्रां व॑ः प्रथ॒मम॒श्विनो॒षस॑म॒ग्निं समि॑द्धं॒ भग॑मू॒तये॑ हुवे ।
इन्द्रं॒ विष्णुं॑ पू॒षणं॒ ब्रह्म॑ण॒स्पति॑मादि॒त्यान्द्यावा॑पृथि॒वी अ॒पः स्व॑ः
dadhikrāṃ vaḥ prathamamaśvinoṣasamagniṃ samiddhaṃ bhagamūtaye huve |
indraṃ viṣṇuṃ pūṣaṇaṃ brahmaṇaspatimādityāndyāvāpṛthivī apaḥ svaḥ
द॒धि॒क्रामु॒ नम॑सा बो॒धय॑न्त उ॒दीरा॑णा य॒ज्ञमु॑पप्र॒यन्त॑ः ।
इळां॑ दे॒वीं ब॒र्हिषि॑ सा॒दय॑न्तो॒ऽश्विना॒ विप्रा॑ सु॒हवा॑ हुवेम
dadhikrāmu namasā bodhayanta udīrāṇā yajñamupaprayantaḥ |
iḻāṃ devīṃ barhiṣi sādayanto'śvinā viprā suhavā huvema
द॒धि॒क्रावा॑णं बुबुधा॒नो अ॒ग्निमुप॑ ब्रुव उ॒षसं॒ सूर्यं॒ गाम् ।
ब्र॒ध्नं माँ॑श्च॒तोर्वरु॑णस्य ब॒भ्रुं ते विश्वा॒स्मद्दु॑रि॒ता या॑वयन्तु
dadhikrāvāṇaṃ bubudhāno agnimupa bruva uṣasaṃ sūryaṃ gām |
bradhnaṃ mām̐ścatorvaruṇasya babhruṃ te viśvāsmadduritā yāvayantu
द॒धि॒क्रावा॑ प्रथ॒मो वा॒ज्यर्वाग्रे॒ रथा॑नां भवति प्रजा॒नन् ।
सं॒वि॒दा॒न उ॒षसा॒ सूर्ये॑णादि॒त्येभि॒र्वसु॑भि॒रङ्गि॑रोभिः
dadhikrāvā prathamo vājyarvāgre rathānāṃ bhavati prajānan |
saṃvidāna uṣasā sūryeṇādityebhirvasubhiraṅgirobhiḥ
आ नो॑ दधि॒क्राः प॒थ्या॑मनक्त्वृ॒तस्य॒ पन्था॒मन्वे॑त॒वा उ॑ ।
शृ॒णोतु॑ नो॒ दैव्यं॒ शर्धो॑ अ॒ग्निः शृ॒ण्वन्तु॒ विश्वे॑ महि॒षा अमू॑राः
ā no dadhikrāḥ pathyāmanaktvṛtasya panthāmanvetavā u |
śṛṇotu no daivyaṃ śardho agniḥ śṛṇvantu viśve mahiṣā amūrāḥ
Text source: Wikisource · CC BY-SA 4.0 (Wikisource transcription of a public-domain text)
