Rishi: मैत्रावरुणिर्वसिष्ठः · Devata: विश्वे देवाः · Metre: त्रिष्टुप्
5 verses · 43 of 104
Seekers of the gods sing heaven and earth with homage at the rites, says Vasishtha, and the poets' unmatched prayers spread out like branches of a tree. Let the rite go forth like a swift horse; raise the ghee ladles with one mind, spread the grass, for the flames have risen toward the gods. Let the gods sit on the top of the grass like sons around their mother, and let the ladle anoint the assembly. Agni is asked to give among the clans, so that with him we stay unharmed and companions in wealth.
प्र वो॑ य॒ज्ञेषु॑ देव॒यन्तो॑ अर्च॒न्द्यावा॒ नमो॑भिः पृथि॒वी इ॒षध्यै॑ ।
येषां॒ ब्रह्मा॒ण्यस॑मानि॒ विप्रा॒ विष्व॑ग्वि॒यन्ति॑ व॒निनो॒ न शाखा॑ः
pra vo yajñeṣu devayanto arcandyāvā namobhiḥ pṛthivī iṣadhyai |
yeṣāṃ brahmāṇyasamāni viprā viṣvagviyanti vanino na śākhāḥ
प्र य॒ज्ञ ए॑तु॒ हेत्वो॒ न सप्ति॒रुद्य॑च्छध्वं॒ सम॑नसो घृ॒ताची॑ः ।
स्तृ॒णी॒त ब॒र्हिर॑ध्व॒राय॑ सा॒धूर्ध्वा शो॒चींषि॑ देव॒यून्य॑स्थुः
pra yajña etu hetvo na saptirudyacchadhvaṃ samanaso ghṛtācīḥ |
stṛṇīta barhiradhvarāya sādhūrdhvā śocīṃṣi devayūnyasthuḥ
आ पु॒त्रासो॒ न मा॒तरं॒ विभृ॑त्रा॒ः सानौ॑ दे॒वासो॑ ब॒र्हिष॑ः सदन्तु ।
आ वि॒श्वाची॑ विद॒थ्या॑मन॒क्त्वग्ने॒ मा नो॑ दे॒वता॑ता॒ मृध॑स्कः
ā putrāso na mātaraṃ vibhṛtrāḥ sānau devāso barhiṣaḥ sadantu |
ā viśvācī vidathyāmanaktvagne mā no devatātā mṛdhaskaḥ
ते सी॑षपन्त॒ जोष॒मा यज॑त्रा ऋ॒तस्य॒ धारा॑ः सु॒दुघा॒ दुहा॑नाः ।
ज्येष्ठं॑ वो अ॒द्य मह॒ आ वसू॑ना॒मा ग॑न्तन॒ सम॑नसो॒ यति॒ ष्ठ
te sīṣapanta joṣamā yajatrā ṛtasya dhārāḥ sudughā duhānāḥ |
jyeṣṭhaṃ vo adya maha ā vasūnāmā gantana samanaso yati ṣṭha
ए॒वा नो॑ अग्ने वि॒क्ष्वा द॑शस्य॒ त्वया॑ व॒यं स॑हसाव॒न्नास्क्रा॑ः ।
रा॒या यु॒जा स॑ध॒मादो॒ अरि॑ष्टा यू॒यं पा॑त स्व॒स्तिभि॒ः सदा॑ नः
evā no agne vikṣvā daśasya tvayā vayaṃ sahasāvannāskrāḥ |
rāyā yujā sadhamādo ariṣṭā yūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)
