न सोम॒ इन्द्र॒मसु॑तो ममाद॒ नाब्र॑ह्माणो म॒घवा॑नं सु॒तास॑ः ।
तस्मा॑ उ॒क्थं ज॑नये॒ यज्जुजो॑षन्नृ॒वन्नवी॑यः शृ॒णव॒द्यथा॑ नः
na soma indramasuto mamāda nābrahmāṇo maghavānaṃ sutāsaḥ |
tasmā ukthaṃ janaye yajjujoṣannṛvannavīyaḥ śṛṇavadyathā naḥ
Mandala 7
Sukta 26: Soma unpressed gladdens not Indra
Rishi: मैत्रावरुणिर्वसिष्ठः · Devata: इन्द्रः · Metre: त्रिष्टुप्
5 verses · 26 of 104
What happens in this chapter
Soma unpressed gladdens not Indra
Unpressed Soma has never gladdened Indra, says Vasishtha, nor pressed Soma without prayer. So he brings forth a hymn Indra will enjoy, new and manly, that he may hear us. At every hymn, at every chant, the pressed drops gladden Indra, when men of one mind call him for help as sons call a father. He has done the deeds the poets tell at the pressings and will do others. As one husband cleanses many wives, he has cleansed the forts. Indra alone is the swift sharer of bounty. Vasishtha praises the bull of the peoples for help at the pressing and asks for thousands of prizes.
उ॒क्थौ॑क्थे॒ सोम॒ इन्द्रं॑ ममाद नी॒थेनी॑थे म॒घवा॑नं सु॒तास॑ः ।
यदीं॑ स॒बाध॑ः पि॒तरं॒ न पु॒त्राः स॑मा॒नद॑क्षा॒ अव॑से॒ हव॑न्ते
ukthaukthe soma indraṃ mamāda nīthenīthe maghavānaṃ sutāsaḥ |
yadīṃ sabādhaḥ pitaraṃ na putrāḥ samānadakṣā avase havante
च॒कार॒ ता कृ॒णव॑न्नू॒नम॒न्या यानि॑ ब्रु॒वन्ति॑ वे॒धस॑ः सु॒तेषु॑ ।
जनी॑रिव॒ पति॒रेक॑ः समा॒नो नि मा॑मृजे॒ पुर॒ इन्द्र॒ः सु सर्वा॑ः
cakāra tā kṛṇavannūnamanyā yāni bruvanti vedhasaḥ suteṣu |
janīriva patirekaḥ samāno ni māmṛje pura indraḥ su sarvāḥ
ए॒वा तमा॑हुरु॒त शृ॑ण्व॒ इन्द्र॒ एको॑ विभ॒क्ता त॒रणि॑र्म॒घाना॑म् ।
मि॒थ॒स्तुर॑ ऊ॒तयो॒ यस्य॑ पू॒र्वीर॒स्मे भ॒द्राणि॑ सश्चत प्रि॒याणि॑
evā tamāhuruta śṛṇva indra eko vibhaktā taraṇirmaghānām |
mithastura ūtayo yasya pūrvīrasme bhadrāṇi saścata priyāṇi
ए॒वा वसि॑ष्ठ॒ इन्द्र॑मू॒तये॒ नॄन्कृ॑ष्टी॒नां वृ॑ष॒भं सु॒ते गृ॑णाति ।
स॒ह॒स्रिण॒ उप॑ नो माहि॒ वाजा॑न्यू॒यं पा॑त स्व॒स्तिभि॒ः सदा॑ नः
evā vasiṣṭha indramūtaye nṝnkṛṣṭīnāṃ vṛṣabhaṃ sute gṛṇāti |
sahasriṇa upa no māhi vājānyūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)