Mandala 7

Sukta 11: Without you the immortals feast not

Rishi: मैत्रावरुणिर्वसिष्ठः · Devata: अग्निः · Metre: त्रिष्टुप्

5 verses · 11 of 104

What happens in this chapter

Without you the immortals feast not

Vasishtha tells Agni that he is the great banner of the rite: without him the immortals take no delight. Let him come on one chariot with all the gods and sit as first hotar. Men with offerings always call on him to be the swift messenger, and days turn fair for the one on whose grass he sits with the gods. Three times a night they make known his treasures for the giver. Agni rules the great sacrifice and every prepared offering; the Vasus loved his skill and the gods made him bearer of oblations. Let the gods led by Indra rejoice here, and let this rite reach heaven.

11.1

म॒हाँ अ॑स्यध्व॒रस्य॑ प्रके॒तो न ऋ॒ते त्वद॒मृता॑ मादयन्ते ।
आ विश्वे॑भिः स॒रथं॑ याहि दे॒वैर्न्य॑ग्ने॒ होता॑ प्रथ॒मः स॑दे॒ह

mahām̐ asyadhvarasya praketo na ṛte tvadamṛtā mādayante |
ā viśvebhiḥ sarathaṃ yāhi devairnyagne hotā prathamaḥ sadeha

11.2

त्वामी॑ळते अजि॒रं दू॒त्या॑य ह॒विष्म॑न्त॒ः सद॒मिन्मानु॑षासः ।
यस्य॑ दे॒वैरास॑दो ब॒र्हिर॒ग्नेऽहा॑न्यस्मै सु॒दिना॑ भवन्ति

tvāmīḻate ajiraṃ dūtyāya haviṣmantaḥ sadaminmānuṣāsaḥ |
yasya devairāsado barhiragne'hānyasmai sudinā bhavanti

11.3

त्रिश्चि॑द॒क्तोः प्र चि॑कितु॒र्वसू॑नि॒ त्वे अ॒न्तर्दा॒शुषे॒ मर्त्या॑य ।
म॒नु॒ष्वद॑ग्न इ॒ह य॑क्षि दे॒वान्भवा॑ नो दू॒तो अ॑भिशस्ति॒पावा॑

triścidaktoḥ pra cikiturvasūni tve antardāśuṣe martyāya |
manuṣvadagna iha yakṣi devānbhavā no dūto abhiśastipāvā

11.4

अ॒ग्निरी॑शे बृह॒तो अ॑ध्व॒रस्या॒ग्निर्विश्व॑स्य ह॒विष॑ः कृ॒तस्य॑ ।
क्रतुं॒ ह्य॑स्य॒ वस॑वो जु॒षन्ताथा॑ दे॒वा द॑धिरे हव्य॒वाह॑म्

agnirīśe bṛhato adhvarasyāgnirviśvasya haviṣaḥ kṛtasya |
kratuṃ hyasya vasavo juṣantāthā devā dadhire havyavāham

11.5

आग्ने॑ वह हवि॒रद्या॑य दे॒वानिन्द्र॑ज्येष्ठास इ॒ह मा॑दयन्ताम् ।
इ॒मं य॒ज्ञं दि॒वि दे॒वेषु॑ धेहि यू॒यं पा॑त स्व॒स्तिभि॒ः सदा॑ नः

āgne vaha haviradyāya devānindrajyeṣṭhāsa iha mādayantām |
imaṃ yajñaṃ divi deveṣu dhehi yūyaṃ pāta svastibhiḥ sadā naḥ

Text source: Wikisource · CC BY-SA 4.0 (Wikisource transcription of a public-domain text)