Rishi: बार्हस्पत्यो भरद्वाजः · Devata: इन्द्रासोमौ · Metre: त्रिष्टुप्
5 verses · 72 of 75
Bharadvaja Barhaspatya praises Indra and Soma together in trishtubh, five mantras of their first great deeds. They found the sun and the light, and struck down all darkness and every scorner. They make the dawn shine and lead the sun up with its light; they propped up heaven with a pillar and spread out mother earth. They slew Ahi, Vritra, who lay round the waters, and heaven approved; they sent the river floods forward and filled the many seas. They placed the cooked milk within the raw cows. The poet asks them for a rescuing wealth with offspring and for manly strength that wins in battle.
इन्द्रा॑सोमा॒ महि॒ तद्वां॑ महि॒त्वं यु॒वं म॒हानि॑ प्रथ॒मानि॑ चक्रथुः ।
यु॒वं सूर्यं॑ विवि॒दथु॑र्यु॒वं स्व१॒॑र्विश्वा॒ तमां॑स्यहतं नि॒दश्च॑
indrāsomā mahi tadvāṃ mahitvaṃ yuvaṃ mahāni prathamāni cakrathuḥ |
yuvaṃ sūryaṃ vividathuryuvaṃ svarviśvā tamāṃsyahataṃ nidaśca
इन्द्रा॑सोमा वा॒सय॑थ उ॒षास॒मुत्सूर्यं॑ नयथो॒ ज्योति॑षा स॒ह ।
उप॒ द्यां स्क॒म्भथु॒ः स्कम्भ॑ने॒नाप्र॑थतं पृथि॒वीं मा॒तरं॒ वि
indrāsomā vāsayatha uṣāsamutsūryaṃ nayatho jyotiṣā saha |
upa dyāṃ skambhathuḥ skambhanenāprathataṃ pṛthivīṃ mātaraṃ vi
इन्द्रा॑सोमा॒वहि॑म॒पः प॑रि॒ष्ठां ह॒थो वृ॒त्रमनु॑ वां॒ द्यौर॑मन्यत ।
प्रार्णां॑स्यैरयतं न॒दीना॒मा स॑मु॒द्राणि॑ पप्रथुः पु॒रूणि॑
indrāsomāvahimapaḥ pariṣṭhāṃ hatho vṛtramanu vāṃ dyauramanyata |
prārṇāṃsyairayataṃ nadīnāmā samudrāṇi paprathuḥ purūṇi
इन्द्रा॑सोमा प॒क्वमा॒मास्व॒न्तर्नि गवा॒मिद्द॑धथुर्व॒क्षणा॑सु ।
ज॒गृ॒भथु॒रन॑पिनद्धमासु॒ रुश॑च्चि॒त्रासु॒ जग॑तीष्व॒न्तः
indrāsomā pakvamāmāsvantarni gavāmiddadhathurvakṣaṇāsu |
jagṛbhathuranapinaddhamāsu ruśaccitrāsu jagatīṣvantaḥ
इन्द्रा॑सोमा यु॒वम॒ङ्ग तरु॑त्रमपत्य॒साचं॒ श्रुत्यं॑ रराथे ।
यु॒वं शुष्मं॒ नर्यं॑ चर्ष॒णिभ्य॒ः सं वि॑व्यथुः पृतना॒षाह॑मुग्रा
indrāsomā yuvamaṅga tarutramapatyasācaṃ śrutyaṃ rarāthe |
yuvaṃ śuṣmaṃ naryaṃ carṣaṇibhyaḥ saṃ vivyathuḥ pṛtanāṣāhamugrā
Text source: Wikisource · CC BY-SA 4.0 (Wikisource transcription of a public-domain text)
