Rishi: बार्हस्पत्यो भरद्वाजः · Devata: सविता · Metre: जगती, ४-६ त्रिष्टुप्
6 verses · 71 of 75
Bharadvaja Barhaspatya praises Savitar in jagati and trishtubh. The deva has lifted his golden arms for the impulse of the day; young and skilful, he anoints his hands with ghee. May we live under his excellent quickening, he who settles and sends forth every two-footed and four-footed creature. Golden-tongued, he is asked to guard the home with his unfailing protections, so no evil-wisher rules over us. Each evening he rises again, kind lord of the house, iron-jawed, sweet-tongued, bringing much good to the giver. The last mantra asks for good today, good tomorrow, good day after day.
उदु॒ ष्य दे॒वः स॑वि॒ता हि॑र॒ण्यया॑ बा॒हू अ॑यंस्त॒ सव॑नाय सु॒क्रतु॑ः ।
घृ॒तेन॑ पा॒णी अ॒भि प्रु॑ष्णुते म॒खो युवा॑ सु॒दक्षो॒ रज॑सो॒ विध॑र्मणि
udu ṣya devaḥ savitā hiraṇyayā bāhū ayaṃsta savanāya sukratuḥ |
ghṛtena pāṇī abhi pruṣṇute makho yuvā sudakṣo rajaso vidharmaṇi
दे॒वस्य॑ व॒यं स॑वि॒तुः सवी॑मनि॒ श्रेष्ठे॑ स्याम॒ वसु॑नश्च दा॒वने॑ ।
यो विश्व॑स्य द्वि॒पदो॒ यश्चतु॑ष्पदो नि॒वेश॑ने प्रस॒वे चासि॒ भूम॑नः
devasya vayaṃ savituḥ savīmani śreṣṭhe syāma vasunaśca dāvane |
yo viśvasya dvipado yaścatuṣpado niveśane prasave cāsi bhūmanaḥ
अद॑ब्धेभिः सवितः पा॒युभि॒ष्ट्वं शि॒वेभि॑र॒द्य परि॑ पाहि नो॒ गय॑म् ।
हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घशं॑स ईशत
adabdhebhiḥ savitaḥ pāyubhiṣṭvaṃ śivebhiradya pari pāhi no gayam |
hiraṇyajihvaḥ suvitāya navyase rakṣā mākirno aghaśaṃsa īśata
उदु॒ ष्य दे॒वः स॑वि॒ता दमू॑ना॒ हिर॑ण्यपाणिः प्रतिदो॒षम॑स्थात् ।
अयो॑हनुर्यज॒तो म॒न्द्रजि॑ह्व॒ आ दा॒शुषे॑ सुवति॒ भूरि॑ वा॒मम्
udu ṣya devaḥ savitā damūnā hiraṇyapāṇiḥ pratidoṣamasthāt |
ayohanuryajato mandrajihva ā dāśuṣe suvati bhūri vāmam
उदू॑ अयाँ उपव॒क्तेव॑ बा॒हू हि॑र॒ण्यया॑ सवि॒ता सु॒प्रती॑का ।
दि॒वो रोहां॑स्यरुहत्पृथि॒व्या अरी॑रमत्प॒तय॒त्कच्चि॒दभ्व॑म्
udū ayām̐ upavakteva bāhū hiraṇyayā savitā supratīkā |
divo rohāṃsyaruhatpṛthivyā arīramatpatayatkaccidabhvam
वा॒मम॒द्य स॑वितर्वा॒ममु॒ श्वो दि॒वेदि॑वे वा॒मम॒स्मभ्यं॑ सावीः ।
वा॒मस्य॒ हि क्षय॑स्य देव॒ भूरे॑र॒या धि॒या वा॑म॒भाज॑ः स्याम
vāmamadya savitarvāmamu śvo divedive vāmamasmabhyaṃ sāvīḥ |
vāmasya hi kṣayasya deva bhūrerayā dhiyā vāmabhājaḥ syāma
Text source: Wikisource · CC BY-SA 4.0 (Wikisource transcription of a public-domain text)
