ए॒षा स्या नो॑ दुहि॒ता दि॑वो॒जाः क्षि॒तीरु॒च्छन्ती॒ मानु॑षीरजीगः ।
या भा॒नुना॒ रुश॑ता रा॒म्यास्वज्ञा॑यि ति॒रस्तम॑सश्चिद॒क्तून्
eṣā syā no duhitā divojāḥ kṣitīrucchantī mānuṣīrajīgaḥ |
yā bhānunā ruśatā rāmyāsvajñāyi tirastamasaścidaktūn
Mandala 6
Sukta 65: Dawn who opened the cow-stall
Rishi: बार्हस्पत्यो भरद्वाजः · Devata: उषाः · Metre: त्रिष्टुप्
6 verses · 65 of 75
What happens in this chapter
Dawn who opened the cow-stall
Bharadvaja Barhaspatya sings again to Ushas in trishtubh. This daughter of heaven, born in the sky, has woken the human dwellings; with her bright glow she is seen through the dark of the nights. The dawns go with ruddy horses and shining chariots, leading the great yajna forward and driving away the night's darkness. They bring fame, food and vigour to the giver; now is the time for treasure. The Angirases praise Dawn, who stands on the mountain, for they split the cow-pens with their song and prayer, and the calling of the devas came true. Shine as of old, the poet asks, as you did for Bharadvaja.
वि तद्य॑युररुण॒युग्भि॒रश्वै॑श्चि॒त्रं भा॑न्त्यु॒षस॑श्च॒न्द्रर॑थाः ।
अग्रं॑ य॒ज्ञस्य॑ बृह॒तो नय॑न्ती॒र्वि ता बा॑धन्ते॒ तम॒ ऊर्म्या॑याः
vi tadyayuraruṇayugbhiraśvaiścitraṃ bhāntyuṣasaścandrarathāḥ |
agraṃ yajñasya bṛhato nayantīrvi tā bādhante tama ūrmyāyāḥ
श्रवो॒ वाज॒मिष॒मूर्जं॒ वह॑न्ती॒र्नि दा॒शुष॑ उषसो॒ मर्त्या॑य ।
म॒घोनी॑र्वी॒रव॒त्पत्य॑माना॒ अवो॑ धात विध॒ते रत्न॑म॒द्य
śravo vājamiṣamūrjaṃ vahantīrni dāśuṣa uṣaso martyāya |
maghonīrvīravatpatyamānā avo dhāta vidhate ratnamadya
इ॒दा हि वो॑ विध॒ते रत्न॒मस्ती॒दा वी॒राय॑ दा॒शुष॑ उषासः ।
इ॒दा विप्रा॑य॒ जर॑ते॒ यदु॒क्था नि ष्म॒ माव॑ते वहथा पु॒रा चि॑त्
idā hi vo vidhate ratnamastīdā vīrāya dāśuṣa uṣāsaḥ |
idā viprāya jarate yadukthā ni ṣma māvate vahathā purā cit
इ॒दा हि त॑ उषो अद्रिसानो गो॒त्रा गवा॒मङ्गि॑रसो गृ॒णन्ति॑ ।
व्य१॒॑र्केण॑ बिभिदु॒र्ब्रह्म॑णा च स॒त्या नृ॒णाम॑भवद्दे॒वहू॑तिः
idā hi ta uṣo adrisāno gotrā gavāmaṅgiraso gṛṇanti |
vyarkeṇa bibhidurbrahmaṇā ca satyā nṛṇāmabhavaddevahūtiḥ
उ॒च्छा दि॑वो दुहितः प्रत्न॒वन्नो॑ भरद्वाज॒वद्वि॑ध॒ते म॑घोनि ।
सु॒वीरं॑ र॒यिं गृ॑ण॒ते रि॑रीह्युरुगा॒यमधि॑ धेहि॒ श्रवो॑ नः
ucchā divo duhitaḥ pratnavanno bharadvājavadvidhate maghoni |
suvīraṃ rayiṃ gṛṇate rirīhyurugāyamadhi dhehi śravo naḥ
Text source: Wikisource · CC BY-SA 4.0 (Wikisource transcription of a public-domain text)