इन्द्र॒ पिब॒ तुभ्यं॑ सु॒तो मदा॒याव॑ स्य॒ हरी॒ वि मु॑चा॒ सखा॑या ।
उ॒त प्र गा॑य ग॒ण आ नि॒षद्याथा॑ य॒ज्ञाय॑ गृण॒ते वयो॑ धाः
indra piba tubhyaṃ suto madāyāva sya harī vi mucā sakhāyā |
uta pra gāya gaṇa ā niṣadyāthā yajñāya gṛṇate vayo dhāḥ
Mandala 6
Sukta 40: Unyoke your bays and drink, Indra
Rishi: बार्हस्पत्यो भरद्वाजः · Devata: इन्द्रः · Metre: त्रिष्टुप्
5 verses · 40 of 75
What happens in this chapter
Unyoke your bays and drink, Indra
A short trishtubh invitation to Indra from Bharadvaja Barhaspatya. The Soma is pressed for his delight: let him unyoke his two bay horses, his friends, sit among the singers and give vigour to the one who sacrifices. This is the drink he drank as soon as he was born; cows, men, waters and the pressing stones have readied it. With the fire kindled, the poet calls him again and again with a longing heart. Wherever he is, in far heaven or in his own seat, let him come with his teams and the Maruts to guard the yajna.
अस्य॑ पिब॒ यस्य॑ जज्ञा॒न इ॑न्द्र॒ मदा॑य॒ क्रत्वे॒ अपि॑बो विरप्शिन् ।
तमु॑ ते॒ गावो॒ नर॒ आपो॒ अद्रि॒रिन्दुं॒ सम॑ह्यन्पी॒तये॒ सम॑स्मै
asya piba yasya jajñāna indra madāya kratve apibo virapśin |
tamu te gāvo nara āpo adririnduṃ samahyanpītaye samasmai
समि॑द्धे अ॒ग्नौ सु॒त इ॑न्द्र॒ सोम॒ आ त्वा॑ वहन्तु॒ हर॑यो॒ वहि॑ष्ठाः ।
त्वा॒य॒ता मन॑सा जोहवी॒मीन्द्रा या॑हि सुवि॒ताय॑ म॒हे न॑ः
samiddhe agnau suta indra soma ā tvā vahantu harayo vahiṣṭhāḥ |
tvāyatā manasā johavīmīndrā yāhi suvitāya mahe naḥ
आ या॑हि॒ शश्व॑दुश॒ता य॑या॒थेन्द्र॑ म॒हा मन॑सा सोम॒पेय॑म् ।
उप॒ ब्रह्मा॑णि शृणव इ॒मा नोऽथा॑ ते य॒ज्ञस्त॒न्वे॒३॒॑ वयो॑ धात्
ā yāhi śaśvaduśatā yayāthendra mahā manasā somapeyam |
upa brahmāṇi śṛṇava imā no'thā te yajñastanve vayo dhāt
यदि॑न्द्र दि॒वि पार्ये॒ यदृध॒ग्यद्वा॒ स्वे सद॑ने॒ यत्र॒ वासि॑ ।
अतो॑ नो य॒ज्ञमव॑से नि॒युत्वा॑न्स॒जोषा॑ः पाहि गिर्वणो म॒रुद्भि॑ः
yadindra divi pārye yadṛdhagyadvā sve sadane yatra vāsi |
ato no yajñamavase niyutvānsajoṣāḥ pāhi girvaṇo marudbhiḥ
Text source: Wikisource · CC BY-SA 4.0 (Wikisource transcription of a public-domain text)