Rishi: शुनहोत्रो भारद्वाजः · Devata: इन्द्रः · Metre: त्रिष्टुप्
5 verses · 34 of 75
Shunahotra, son of Bharadvaja, praises Indra in trishtubh. Many songs have come together in Indra, and wide thoughts go out from him; the hymns of seers old and new have vied for him. He is called by many, praised alone at the sacrifices, yoked like a chariot for great strength. Prayers do not harm him; they reach him and make him grow, and whether singers number a hundred or a thousand, it is a joy to him. Soma has been poured into him as months are poured into heaven. The rishi offers this loud chant so that Indra may stand as helper in the battle with Vritra.
सं च॒ त्वे ज॒ग्मुर्गिर॑ इन्द्र पू॒र्वीर्वि च॒ त्वद्य॑न्ति वि॒भ्वो॑ मनी॒षाः ।
पु॒रा नू॒नं च॑ स्तु॒तय॒ ऋषी॑णां पस्पृ॒ध्र इन्द्रे॒ अध्यु॑क्था॒र्का
saṃ ca tve jagmurgira indra pūrvīrvi ca tvadyanti vibhvo manīṣāḥ |
purā nūnaṃ ca stutaya ṛṣīṇāṃ paspṛdhra indre adhyukthārkā
पु॒रु॒हू॒तो यः पु॑रुगू॒र्त ऋभ्वाँ॒ एक॑ः पुरुप्रश॒स्तो अस्ति॑ य॒ज्ञैः ।
रथो॒ न म॒हे शव॑से युजा॒नो॒३॒॑ऽस्माभि॒रिन्द्रो॑ अनु॒माद्यो॑ भूत्
puruhūto yaḥ purugūrta ṛbhvām̐ ekaḥ purupraśasto asti yajñaiḥ |
ratho na mahe śavase yujāno'smābhirindro anumādyo bhūt
न यं हिंस॑न्ति धी॒तयो॒ न वाणी॒रिन्द्रं॒ नक्ष॒न्तीद॒भि व॒र्धय॑न्तीः ।
यदि॑ स्तो॒तार॑ः श॒तं यत्स॒हस्रं॑ गृ॒णन्ति॒ गिर्व॑णसं॒ शं तद॑स्मै
na yaṃ hiṃsanti dhītayo na vāṇīrindraṃ nakṣantīdabhi vardhayantīḥ |
yadi stotāraḥ śataṃ yatsahasraṃ gṛṇanti girvaṇasaṃ śaṃ tadasmai
अस्मा॑ ए॒तद्दि॒व्य१॒॑र्चेव॑ मा॒सा मि॑मि॒क्ष इन्द्रे॒ न्य॑यामि॒ सोम॑ः ।
जनं॒ न धन्व॑न्न॒भि सं यदाप॑ः स॒त्रा वा॑वृधु॒र्हव॑नानि य॒ज्ञैः
asmā etaddivyarceva māsā mimikṣa indre nyayāmi somaḥ |
janaṃ na dhanvannabhi saṃ yadāpaḥ satrā vāvṛdhurhavanāni yajñaiḥ
अस्मा॑ ए॒तन्मह्या॑ङ्गू॒षम॑स्मा॒ इन्द्रा॑य स्तो॒त्रं म॒तिभि॑रवाचि ।
अस॒द्यथा॑ मह॒ति वृ॑त्र॒तूर्य॒ इन्द्रो॑ वि॒श्वायु॑रवि॒ता वृ॒धश्च॑
asmā etanmahyāṅgūṣamasmā indrāya stotraṃ matibhiravāci |
asadyathā mahati vṛtratūrya indro viśvāyuravitā vṛdhaśca
Text source: Wikisource · CC BY-SA 4.0 (Wikisource transcription of a public-domain text)
