अभू॒रेको॑ रयिपते रयी॒णामा हस्त॑योरधिथा इन्द्र कृ॒ष्टीः ।
वि तो॒के अ॒प्सु तन॑ये च॒ सूरेऽवो॑चन्त चर्ष॒णयो॒ विवा॑चः
abhūreko rayipate rayīṇāmā hastayoradhithā indra kṛṣṭīḥ |
vi toke apsu tanaye ca sūre'vocanta carṣaṇayo vivācaḥ
Mandala 6
Sukta 31: Indra holds the peoples in his hands
Rishi: सुहोत्रो भरद्वाजः · Devata: इन्द्रः · Metre: त्रिष्टुप्, ४ शक्वरी
5 verses · 31 of 75
What happens in this chapter
Indra holds the peoples in his hands
Suhotra of the Bharadvaja line praises Indra in trishtubh, with one shakvari verse. Indra alone is lord of riches and holds the peoples in his two hands; men call on him with many voices for sons, waters and the sun. In fear of him all that stands firm is shaken: heaven and earth, mountains and forests tremble at his coming. With Kutsa he fought Shushna and Kuyava, and stole the wheel of the sun. He smashed the hundred forts of the Dasyu Shambara and gave wealth to Divodasa who pressed Soma and to Bharadvaja who sang. The rishi asks him to mount his fearsome chariot and come.
त्वद्भि॒येन्द्र॒ पार्थि॑वानि॒ विश्वाच्यु॑ता चिच्च्यावयन्ते॒ रजां॑सि ।
द्यावा॒क्षामा॒ पर्व॑तासो॒ वना॑नि॒ विश्वं॑ दृ॒ळ्हं भ॑यते॒ अज्म॒न्ना ते॑
tvadbhiyendra pārthivāni viśvācyutā ciccyāvayante rajāṃsi |
dyāvākṣāmā parvatāso vanāni viśvaṃ dṛḻhaṃ bhayate ajmannā te
त्वं कुत्से॑ना॒भि शुष्ण॑मिन्द्रा॒शुषं॑ युध्य॒ कुय॑वं॒ गवि॑ष्टौ ।
दश॑ प्रपि॒त्वे अध॒ सूर्य॑स्य मुषा॒यश्च॒क्रमवि॑वे॒ रपां॑सि
tvaṃ kutsenābhi śuṣṇamindrāśuṣaṃ yudhya kuyavaṃ gaviṣṭau |
daśa prapitve adha sūryasya muṣāyaścakramavive rapāṃsi
त्वं श॒तान्यव॒ शम्ब॑रस्य॒ पुरो॑ जघन्थाप्र॒तीनि॒ दस्यो॑ः ।
अशि॑क्षो॒ यत्र॒ शच्या॑ शचीवो॒ दिवो॑दासाय सुन्व॒ते सु॑तक्रे भ॒रद्वा॑जाय गृण॒ते वसू॑नि
tvaṃ śatānyava śambarasya puro jaghanthāpratīni dasyoḥ |
aśikṣo yatra śacyā śacīvo divodāsāya sunvate sutakre bharadvājāya gṛṇate vasūni
स स॑त्यसत्वन्मह॒ते रणा॑य॒ रथ॒मा ति॑ष्ठ तुविनृम्ण भी॒मम् ।
या॒हि प्र॑पथि॒न्नव॒सोप॑ म॒द्रिक्प्र च॑ श्रुत श्रावय चर्ष॒णिभ्य॑ः
sa satyasatvanmahate raṇāya rathamā tiṣṭha tuvinṛmṇa bhīmam |
yāhi prapathinnavasopa madrikpra ca śruta śrāvaya carṣaṇibhyaḥ
Text source: Wikisource · CC BY-SA 4.0 (Wikisource transcription of a public-domain text)