Mandala 5

Sukta 80: Usha walks the path of rita

Rishi: सत्यश्रवा आत्रेयः · Devata: उषाः · Metre: त्रिष्टुप्

6 verses · 80 of 87

What happens in this chapter

Usha walks the path of rita

Satyashravas Atreya praises Usha in Trishtubh. Bright on her course, great, true to rita, ruddy and shining, she brings the light, and the singers greet her with their thoughts. She wakes the people, makes the paths easy and goes in front, on her tall chariot, giving light at the start of the days. Yoking ruddy cows, she opens paths to welfare. She follows the path of rita well, as one who knows, and never confuses the quarters. Like a woman rising from her bath she stands for us to see, driving away hatred and darkness. Young again, she makes the light as before.

80.1

द्यु॒तद्या॑मानं बृह॒तीमृ॒तेन॑ ऋ॒ताव॑रीमरु॒णप्सुं॑ विभा॒तीम् ।
दे॒वीमु॒षसं॒ स्व॑रा॒वह॑न्तीं॒ प्रति॒ विप्रा॑सो म॒तिभि॑र्जरन्ते

dyutadyāmānaṃ bṛhatīmṛtena ṛtāvarīmaruṇapsuṃ vibhātīm |
devīmuṣasaṃ svarāvahantīṃ prati viprāso matibhirjarante

80.2

ए॒षा जनं॑ दर्श॒ता बो॒धय॑न्ती सु॒गान्प॒थः कृ॑ण्व॒ती या॒त्यग्रे॑ ।
बृ॒ह॒द्र॒था बृ॑ह॒ती वि॑श्वमि॒न्वोषा ज्योति॑र्यच्छ॒त्यग्रे॒ अह्ना॑म्

eṣā janaṃ darśatā bodhayantī sugānpathaḥ kṛṇvatī yātyagre |
bṛhadrathā bṛhatī viśvaminvoṣā jyotiryacchatyagre ahnām

80.3

ए॒षा गोभि॑ररु॒णेभि॑र्युजा॒नास्रे॑धन्ती र॒यिमप्रा॑यु चक्रे ।
प॒थो रद॑न्ती सुवि॒ताय॑ दे॒वी पु॑रुष्टु॒ता वि॒श्ववा॑रा॒ वि भा॑ति

eṣā gobhiraruṇebhiryujānāsredhantī rayimaprāyu cakre |
patho radantī suvitāya devī puruṣṭutā viśvavārā vi bhāti

80.4

ए॒षा व्ये॑नी भवति द्वि॒बर्हा॑ आविष्कृण्वा॒ना त॒न्वं॑ पु॒रस्ता॑त् ।
ऋ॒तस्य॒ पन्था॒मन्वे॑ति सा॒धु प्र॑जान॒तीव॒ न दिशो॑ मिनाति

eṣā vyenī bhavati dvibarhā āviṣkṛṇvānā tanvaṃ purastāt |
ṛtasya panthāmanveti sādhu prajānatīva na diśo mināti

80.5

ए॒षा शु॒भ्रा न त॒न्वो॑ विदा॒नोर्ध्वेव॑ स्ना॒ती दृ॒शये॑ नो अस्थात् ।
अप॒ द्वेषो॒ बाध॑माना॒ तमां॑स्यु॒षा दि॒वो दु॑हि॒ता ज्योति॒षागा॑त्

eṣā śubhrā na tanvo vidānordhveva snātī dṛśaye no asthāt |
apa dveṣo bādhamānā tamāṃsyuṣā divo duhitā jyotiṣāgāt

80.6

ए॒षा प्र॑ती॒ची दु॑हि॒ता दि॒वो नॄन्योषे॑व भ॒द्रा नि रि॑णीते॒ अप्स॑ः ।
व्यू॒र्ण्व॒ती दा॒शुषे॒ वार्या॑णि॒ पुन॒र्ज्योति॑र्युव॒तिः पू॒र्वथा॑कः

eṣā pratīcī duhitā divo nṝnyoṣeva bhadrā ni riṇīte apsaḥ |
vyūrṇvatī dāśuṣe vāryāṇi punarjyotiryuvatiḥ pūrvathākaḥ

Text source: Wikisource · CC BY-SA 4.0 (Wikisource transcription of a public-domain text)