Rishi: भौमोऽत्रिः · Devata: अश्विनौ · Metre: त्रिष्टुप्
5 verses · 77 of 87
Atri Bhauma teaches in Trishtubh that the Ashvins, who come at dawn, must be worshipped first, before the greedy and ungenerous one can drink. Worship them in the morning; the evening offering does not please the Devas. Whoever sacrifices earlier is the better sacrificer. Their chariot has a golden skin, is honey-coloured and drips with ghee, swift as thought and the wind, and with it they pass beyond every danger. The one who serves the Nasatyas best and shares out food with them is blessed in his children and always prevails. The last verse repeats the prayer of 5.76 for new help and every blessing.
प्रा॒त॒र्यावा॑णा प्रथ॒मा य॑जध्वं पु॒रा गृध्रा॒दर॑रुषः पिबातः ।
प्रा॒तर्हि य॒ज्ञम॒श्विना॑ द॒धाते॒ प्र शं॑सन्ति क॒वय॑ः पूर्व॒भाज॑ः
prātaryāvāṇā prathamā yajadhvaṃ purā gṛdhrādararuṣaḥ pibātaḥ |
prātarhi yajñamaśvinā dadhāte pra śaṃsanti kavayaḥ pūrvabhājaḥ
प्रा॒तर्य॑जध्वम॒श्विना॑ हिनोत॒ न सा॒यम॑स्ति देव॒या अजु॑ष्टम् ।
उ॒तान्यो अ॒स्मद्य॑जते॒ वि चाव॒ः पूर्व॑ःपूर्वो॒ यज॑मानो॒ वनी॑यान्
prātaryajadhvamaśvinā hinota na sāyamasti devayā ajuṣṭam |
utānyo asmadyajate vi cāvaḥ pūrvaḥpūrvo yajamāno vanīyān
हिर॑ण्यत्व॒ङ्मधु॑वर्णो घृ॒तस्नु॒ः पृक्षो॒ वह॒न्ना रथो॑ वर्तते वाम् ।
मनो॑जवा अश्विना॒ वात॑रंहा॒ येना॑तिया॒थो दु॑रि॒तानि॒ विश्वा॑
hiraṇyatvaṅmadhuvarṇo ghṛtasnuḥ pṛkṣo vahannā ratho vartate vām |
manojavā aśvinā vātaraṃhā yenātiyātho duritāni viśvā
यो भूयि॑ष्ठं॒ नास॑त्याभ्यां वि॒वेष॒ चनि॑ष्ठं पि॒त्वो रर॑ते विभा॒गे ।
स तो॒कम॑स्य पीपर॒च्छमी॑भि॒रनू॑र्ध्वभास॒ः सद॒मित्तु॑तुर्यात्
yo bhūyiṣṭhaṃ nāsatyābhyāṃ viveṣa caniṣṭhaṃ pitvo rarate vibhāge |
sa tokamasya pīparacchamībhiranūrdhvabhāsaḥ sadamittuturyāt
सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि
samaśvinoravasā nūtanena mayobhuvā supraṇītī gamema |
ā no rayiṃ vahatamota vīrānā viśvānyamṛtā saubhagāni
Text source: Wikisource · CC BY-SA 4.0 (Wikisource transcription of a public-domain text)
