स आ ग॑म॒दिन्द्रो॒ यो वसू॑नां॒ चिके॑त॒द्दातुं॒ दाम॑नो रयी॒णाम् ।
ध॒न्व॒च॒रो न वंस॑गस्तृषा॒णश्च॑कमा॒नः पि॑बतु दु॒ग्धमं॒शुम्
sa ā gamadindro yo vasūnāṃ ciketaddātuṃ dāmano rayīṇām |
dhanvacaro na vaṃsagastṛṣāṇaścakamānaḥ pibatu dugdhamaṃśum
Mandala 5
Sukta 36: My mind trembles like a wheel
Rishi: प्रभूवसुराङ्गिरसः · Devata: इन्द्रः · Metre: त्रिष्टुप्, ३ जगती
6 verses · 36 of 87
What happens in this chapter
My mind trembles like a wheel
Prabhuvasu of the Angiras family praises Indra in trishtubh with one jagati. May Indra come, who knows how to give riches; like a thirsty wild buffalo wandering the desert, may he drink the milked stalk. Soma climbs his jaws like a creeper on a mountain's back. Then a personal cry: my mind trembles like a turning wheel, from fear of want. The singer raises his voice like a pressing stone; Indra gives wealth with the left hand and the right. The hymn piles up the word vrisha, bull. The last mantra praises young Shrutaratha, who gave two red steeds with three hundred.
आ ते॒ हनू॑ हरिवः शूर॒ शिप्रे॒ रुह॒त्सोमो॒ न पर्व॑तस्य पृ॒ष्ठे ।
अनु॑ त्वा राज॒न्नर्व॑तो॒ न हि॒न्वन्गी॒र्भिर्म॑देम पुरुहूत॒ विश्वे॑
ā te hanū harivaḥ śūra śipre ruhatsomo na parvatasya pṛṣṭhe |
anu tvā rājannarvato na hinvangīrbhirmadema puruhūta viśve
च॒क्रं न वृ॒त्तं पु॑रुहूत वेपते॒ मनो॑ भि॒या मे॒ अम॑ते॒रिद॑द्रिवः ।
रथा॒दधि॑ त्वा जरि॒ता स॑दावृध कु॒विन्नु स्तो॑षन्मघवन्पुरू॒वसु॑ः
cakraṃ na vṛttaṃ puruhūta vepate mano bhiyā me amateridadrivaḥ |
rathādadhi tvā jaritā sadāvṛdha kuvinnu stoṣanmaghavanpurūvasuḥ
ए॒ष ग्रावे॑व जरि॒ता त॑ इ॒न्द्रेय॑र्ति॒ वाचं॑ बृ॒हदा॑शुषा॒णः ।
प्र स॒व्येन॑ मघव॒न्यंसि॑ रा॒यः प्र द॑क्षि॒णिद्ध॑रिवो॒ मा वि वे॑नः
eṣa grāveva jaritā ta indreyarti vācaṃ bṛhadāśuṣāṇaḥ |
pra savyena maghavanyaṃsi rāyaḥ pra dakṣiṇiddharivo mā vi venaḥ
वृषा॑ त्वा॒ वृष॑णं वर्धतु॒ द्यौर्वृषा॒ वृष॑भ्यां वहसे॒ हरि॑भ्याम् ।
स नो॒ वृषा॒ वृष॑रथः सुशिप्र॒ वृष॑क्रतो॒ वृषा॑ वज्रि॒न्भरे॑ धाः
vṛṣā tvā vṛṣaṇaṃ vardhatu dyaurvṛṣā vṛṣabhyāṃ vahase haribhyām |
sa no vṛṣā vṛṣarathaḥ suśipra vṛṣakrato vṛṣā vajrinbhare dhāḥ
यो रोहि॑तौ वा॒जिनौ॑ वा॒जिनी॑वान्त्रि॒भिः श॒तैः सच॑माना॒वदि॑ष्ट ।
यूने॒ सम॑स्मै क्षि॒तयो॑ नमन्तां श्रु॒तर॑थाय मरुतो दुवो॒या
yo rohitau vājinau vājinīvāntribhiḥ śataiḥ sacamānāvadiṣṭa |
yūne samasmai kṣitayo namantāṃ śrutarathāya maruto duvoyā
Text source: Wikisource · CC BY-SA 4.0 (Wikisource transcription of a public-domain text)