Mandala 5

Sukta 35: Guard our chariot in every contest

Rishi: प्रभूवसुराङ्गिरसः · Devata: इन्द्रः · Metre: अनुष्टुप्,८ पङ्क्तिः

8 verses · 35 of 87

What happens in this chapter

Guard our chariot in every contest

Prabhuvasu of the Angiras family asks Indra, in anushtubh with a closing pankti, for his most effective power: strength that overcomes peoples. Whatever help Indra has among the four, the three or the five peoples, let him bring it here. Born bull-like, swift, he is the slayer of Vritrawhom men call to win the prize. The rishi prays: drive against the mortal who acts as foe, lord of strength of a hundred powers. The closing mantras ask Indra to guard our chariot, hard to overtake, going first in battles, and to come to our chariot with his bounty, so we may set our fame in heaven.

35.1

यस्ते॒ साधि॒ष्ठोऽव॑स॒ इन्द्र॒ क्रतु॒ष्टमा भ॑र ।
अ॒स्मभ्यं॑ चर्षणी॒सहं॒ सस्निं॒ वाजे॑षु दु॒ष्टर॑म्

yaste sādhiṣṭho'vasa indra kratuṣṭamā bhara |
asmabhyaṃ carṣaṇīsahaṃ sasniṃ vājeṣu duṣṭaram

35.2

यदि॑न्द्र ते॒ चत॑स्रो॒ यच्छू॑र॒ सन्ति॑ ति॒स्रः ।
यद्वा॒ पञ्च॑ क्षिती॒नामव॒स्तत्सु न॒ आ भ॑र

yadindra te catasro yacchūra santi tisraḥ |
yadvā pañca kṣitīnāmavastatsu na ā bhara

35.3

आ तेऽवो॒ वरे॑ण्यं॒ वृष॑न्तमस्य हूमहे ।
वृष॑जूति॒र्हि ज॑ज्ञि॒ष आ॒भूभि॑रिन्द्र तु॒र्वणि॑ः

ā te'vo vareṇyaṃ vṛṣantamasya hūmahe |
vṛṣajūtirhi jajñiṣa ābhūbhirindra turvaṇiḥ

35.4

वृषा॒ ह्यसि॒ राध॑से जज्ञि॒षे वृष्णि॑ ते॒ शव॑ः ।
स्वक्ष॑त्रं ते धृ॒षन्मन॑ः सत्रा॒हमि॑न्द्र॒ पौंस्य॑म्

vṛṣā hyasi rādhase jajñiṣe vṛṣṇi te śavaḥ |
svakṣatraṃ te dhṛṣanmanaḥ satrāhamindra pauṃsyam

35.5

त्वं तमि॑न्द्र॒ मर्त्य॑ममित्र॒यन्त॑मद्रिवः ।
स॒र्व॒र॒था श॑तक्रतो॒ नि या॑हि शवसस्पते

tvaṃ tamindra martyamamitrayantamadrivaḥ |
sarvarathā śatakrato ni yāhi śavasaspate

35.6

त्वामिद्वृ॑त्रहन्तम॒ जना॑सो वृ॒क्तब॑र्हिषः ।
उ॒ग्रं पू॒र्वीषु॑ पू॒र्व्यं हव॑न्ते॒ वाज॑सातये

tvāmidvṛtrahantama janāso vṛktabarhiṣaḥ |
ugraṃ pūrvīṣu pūrvyaṃ havante vājasātaye

35.7

अ॒स्माक॑मिन्द्र दु॒ष्टरं॑ पुरो॒यावा॑नमा॒जिषु॑ ।
स॒यावा॑नं॒ धने॑धने वाज॒यन्त॑मवा॒ रथ॑म्

asmākamindra duṣṭaraṃ puroyāvānamājiṣu |
sayāvānaṃ dhanedhane vājayantamavā ratham

35.8

अ॒स्माक॑मि॒न्द्रेहि॑ नो॒ रथ॑मवा॒ पुरं॑ध्या ।
व॒यं श॑विष्ठ॒ वार्यं॑ दि॒वि श्रवो॑ दधीमहि दि॒वि स्तोमं॑ मनामहे

asmākamindrehi no rathamavā puraṃdhyā |
vayaṃ śaviṣṭha vāryaṃ divi śravo dadhīmahi divi stomaṃ manāmahe

Text source: Wikisource · CC BY-SA 4.0 (Wikisource transcription of a public-domain text)