प्र वे॒धसे॑ क॒वये॒ वेद्या॑य॒ गिरं॑ भरे य॒शसे॑ पू॒र्व्याय॑ ।
घृ॒तप्र॑सत्तो॒ असु॑रः सु॒शेवो॑ रा॒यो ध॒र्ता ध॒रुणो॒ वस्वो॑ अ॒ग्निः
pra vedhase kavaye vedyāya giraṃ bhare yaśase pūrvyāya |
ghṛtaprasatto asuraḥ suśevo rāyo dhartā dharuṇo vasvo agniḥ
Mandala 5
Sukta 15: Dharuna, the upholder of wealth
Rishi: धरुण आङ्गिरसः · Devata: अग्निः · Metre: त्रिष्टुप्
5 verses · 15 of 87
What happens in this chapter
Dharuna, the upholder of wealth
Dharuna of the Angiras family sings to Agni in trishtubh, and plays on his own name: Agni is dharuna, the support and holder of wealth. The forefathers upheld ṛta by ṛta in the highest heaven, sitting at the foundation of the sky. Newborn, he overcomes the gathered foes, and they stand round him as round an angry lion. Like a mother he spreads out and nourishes every creature, taking many forms. The rishi asks him to guard the broad udder of riches and to lead to great wealth, as he guided Atri.
ऋ॒तेन॑ ऋ॒तं ध॒रुणं॑ धारयन्त य॒ज्ञस्य॑ शा॒के प॑र॒मे व्यो॑मन् ।
दि॒वो धर्म॑न्ध॒रुणे॑ से॒दुषो॒ नॄञ्जा॒तैरजा॑ताँ अ॒भि ये न॑न॒क्षुः
ṛtena ṛtaṃ dharuṇaṃ dhārayanta yajñasya śāke parame vyoman |
divo dharmandharuṇe seduṣo nṝñjātairajātām̐ abhi ye nanakṣuḥ
अ॒ङ्हो॒युव॑स्त॒न्व॑स्तन्वते॒ वि वयो॑ म॒हद्दु॒ष्टरं॑ पू॒र्व्याय॑ ।
स सं॒वतो॒ नव॑जातस्तुतुर्यात्सि॒ङ्हं न क्रु॒द्धम॒भित॒ः परि॑ ष्ठुः
aṅhoyuvastanvastanvate vi vayo mahadduṣṭaraṃ pūrvyāya |
sa saṃvato navajātastuturyātsiṅhaṃ na kruddhamabhitaḥ pari ṣṭhuḥ
मा॒तेव॒ यद्भर॑से पप्रथा॒नो जनं॑जनं॒ धाय॑से॒ चक्ष॑से च ।
वयो॑वयो जरसे॒ यद्दधा॑न॒ः परि॒ त्मना॒ विषु॑रूपो जिगासि
māteva yadbharase paprathāno janaṃjanaṃ dhāyase cakṣase ca |
vayovayo jarase yaddadhānaḥ pari tmanā viṣurūpo jigāsi
वाजो॒ नु ते॒ शव॑सस्पा॒त्वन्त॑मु॒रुं दोघं॑ ध॒रुणं॑ देव रा॒यः ।
प॒दं न ता॒युर्गुहा॒ दधा॑नो म॒हो रा॒ये चि॒तय॒न्नत्रि॑मस्पः
vājo nu te śavasaspātvantamuruṃ doghaṃ dharuṇaṃ deva rāyaḥ |
padaṃ na tāyurguhā dadhāno maho rāye citayannatrimaspaḥ
Text source: Wikisource · CC BY-SA 4.0 (Wikisource transcription of a public-domain text)