Rishi: वामदेवो गौतमः · Devata: अश्विनौ · Metre: जगती, ७ त्रिष्टुप्
7 verses · 45 of 58
Vamadeva Gautama praises the Ashvins in jagati, closing in trishtubh. Yonder light rises; the chariot that goes round is yoked on the ridge of heaven, with three pairs of food on it and a fourth, a skin of honey. At the shining of the dawns your honeyed foods, chariots and horses rise up, uncovering the darkness and spreading light like the Sun. Drink honey with honey-drinking lips; yoke your chariot for honey. Your swans, honeyed, golden-winged, wake at dawn. The fires praise you each morning when the presser with washed hands presses honeyed soma with stones. I have proclaimed your ageless chariot.
ए॒ष स्य भा॒नुरुदि॑यर्ति यु॒ज्यते॒ रथ॒ः परि॑ज्मा दि॒वो अ॒स्य सान॑वि ।
पृ॒क्षासो॑ अस्मिन्मिथु॒ना अधि॒ त्रयो॒ दृति॑स्तु॒रीयो॒ मधु॑नो॒ वि र॑प्शते
eṣa sya bhānurudiyarti yujyate rathaḥ parijmā divo asya sānavi |
pṛkṣāso asminmithunā adhi trayo dṛtisturīyo madhuno vi rapśate
उद्वां॑ पृ॒क्षासो॒ मधु॑मन्त ईरते॒ रथा॒ अश्वा॑स उ॒षसो॒ व्यु॑ष्टिषु ।
अ॒पो॒र्णु॒वन्त॒स्तम॒ आ परी॑वृतं॒ स्व१॒॑र्ण शु॒क्रं त॒न्वन्त॒ आ रज॑ः
udvāṃ pṛkṣāso madhumanta īrate rathā aśvāsa uṣaso vyuṣṭiṣu |
aporṇuvantastama ā parīvṛtaṃ svarṇa śukraṃ tanvanta ā rajaḥ
मध्व॑ः पिबतं मधु॒पेभि॑रा॒सभि॑रु॒त प्रि॒यं मधु॑ने युञ्जाथां॒ रथ॑म् ।
आ व॑र्त॒निं मधु॑ना जिन्वथस्प॒थो दृतिं॑ वहेथे॒ मधु॑मन्तमश्विना
madhvaḥ pibataṃ madhupebhirāsabhiruta priyaṃ madhune yuñjāthāṃ ratham |
ā vartaniṃ madhunā jinvathaspatho dṛtiṃ vahethe madhumantamaśvinā
हं॒सासो॒ ये वां॒ मधु॑मन्तो अ॒स्रिधो॒ हिर॑ण्यपर्णा उ॒हुव॑ उष॒र्बुध॑ः ।
उ॒द॒प्रुतो॑ म॒न्दिनो॑ मन्दिनि॒स्पृशो॒ मध्वो॒ न मक्ष॒ः सव॑नानि गच्छथः
haṃsāso ye vāṃ madhumanto asridho hiraṇyaparṇā uhuva uṣarbudhaḥ |
udapruto mandino mandinispṛśo madhvo na makṣaḥ savanāni gacchathaḥ
स्व॒ध्व॒रासो॒ मधु॑मन्तो अ॒ग्नय॑ उ॒स्रा ज॑रन्ते॒ प्रति॒ वस्तो॑र॒श्विना॑ ।
यन्नि॒क्तह॑स्तस्त॒रणि॑र्विचक्ष॒णः सोमं॑ सु॒षाव॒ मधु॑मन्त॒मद्रि॑भिः
svadhvarāso madhumanto agnaya usrā jarante prati vastoraśvinā |
yanniktahastastaraṇirvicakṣaṇaḥ somaṃ suṣāva madhumantamadribhiḥ
आ॒के॒नि॒पासो॒ अह॑भि॒र्दवि॑ध्वत॒ः स्व१॒॑र्ण शु॒क्रं त॒न्वन्त॒ आ रज॑ः ।
सूर॑श्चि॒दश्वा॑न्युयुजा॒न ई॑यते॒ विश्वाँ॒ अनु॑ स्व॒धया॑ चेतथस्प॒थः
ākenipāso ahabhirdavidhvataḥ svarṇa śukraṃ tanvanta ā rajaḥ |
sūraścidaśvānyuyujāna īyate viśvām̐ anu svadhayā cetathaspathaḥ
प्र वा॑मवोचमश्विना धियं॒धा रथ॒ः स्वश्वो॑ अ॒जरो॒ यो अस्ति॑ ।
येन॑ स॒द्यः परि॒ रजां॑सि या॒थो ह॒विष्म॑न्तं त॒रणिं॑ भो॒जमच्छ॑
pra vāmavocamaśvinā dhiyaṃdhā rathaḥ svaśvo ajaro yo asti |
yena sadyaḥ pari rajāṃsi yātho haviṣmantaṃ taraṇiṃ bhojamaccha
Text source: Wikisource · CC BY-SA 4.0 (Wikisource transcription of a public-domain text)
