Mandala 4

Sukta 28: Indra and Soma open the waters

Rishi: वामदेवो गौतमः · Devata: इन्द्रः, इन्द्रासोमौ वा · Metre: त्रिष्टुप्

5 verses · 28 of 58

What happens in this chapter

Indra and Soma open the waters

Vamadeva Gautama praises Indra together with Soma, the anukramani naming Indra or Indra-Soma, in trishtubh. With Soma as his ally Indra made the waters flow for Manu, slew the serpent, released the seven rivers and opened the closed springs. With Soma's help he tore off the wheel of the Sun. Before midday Indra and Agni together struck the dasyus and laid low many thousands. Indra made the dasyus lowest and the dasa clans without praise. The hymn ends: this is your true deed, Indra and Soma, you broke open the hidden stall of cows and horses.

28.1

त्वा यु॒जा तव॒ तत्सो॑म स॒ख्य इन्द्रो॑ अ॒पो मन॑वे स॒स्रुत॑स्कः ।
अह॒न्नहि॒मरि॑णात्स॒प्त सिन्धू॒नपा॑वृणो॒दपि॑हितेव॒ खानि॑

tvā yujā tava tatsoma sakhya indro apo manave sasrutaskaḥ |
ahannahimariṇātsapta sindhūnapāvṛṇodapihiteva khāni

28.2

त्वा यु॒जा नि खि॑द॒त्सूर्य॒स्येन्द्र॑श्च॒क्रं सह॑सा स॒द्य इ॑न्दो ।
अधि॒ ष्णुना॑ बृह॒ता वर्त॑मानं म॒हो द्रु॒हो अप॑ वि॒श्वायु॑ धायि

tvā yujā ni khidatsūryasyendraścakraṃ sahasā sadya indo |
adhi ṣṇunā bṛhatā vartamānaṃ maho druho apa viśvāyu dhāyi

28.3

अह॒न्निन्द्रो॒ अद॑हद॒ग्निरि॑न्दो पु॒रा दस्यू॑न्म॒ध्यंदि॑नाद॒भीके॑ ।
दु॒र्गे दु॑रो॒णे क्रत्वा॒ न या॒तां पु॒रू स॒हस्रा॒ शर्वा॒ नि ब॑र्हीत्

ahannindro adahadagnirindo purā dasyūnmadhyaṃdinādabhīke |
durge duroṇe kratvā na yātāṃ purū sahasrā śarvā ni barhīt

28.4

विश्व॑स्मात्सीमध॒माँ इ॑न्द्र॒ दस्यू॒न्विशो॒ दासी॑रकृणोरप्रश॒स्ताः ।
अबा॑धेथा॒ममृ॑णतं॒ नि शत्रू॒नवि॑न्देथा॒मप॑चितिं॒ वध॑त्रैः

viśvasmātsīmadhamām̐ indra dasyūnviśo dāsīrakṛṇorapraśastāḥ |
abādhethāmamṛṇataṃ ni śatrūnavindethāmapacitiṃ vadhatraiḥ

28.5

ए॒वा स॒त्यं म॑घवाना यु॒वं तदिन्द्र॑श्च सोमो॒र्वमश्व्यं॒ गोः ।
आद॑र्दृत॒मपि॑हिता॒न्यश्ना॑ रिरि॒चथु॒ः क्षाश्चि॑त्ततृदा॒ना

evā satyaṃ maghavānā yuvaṃ tadindraśca somorvamaśvyaṃ goḥ |
ādardṛtamapihitānyaśnā riricathuḥ kṣāścittatṛdānā

Text source: Wikisource · CC BY-SA 4.0 (Wikisource transcription of a public-domain text)