आ न॑ः स्तु॒त उप॒ वाजे॑भिरू॒ती इन्द्र॑ या॒हि हरि॑भिर्मन्दसा॒नः ।
ति॒रश्चि॑द॒र्यः सव॑ना पु॒रूण्या॑ङ्गू॒षेभि॑र्गृणा॒नः स॒त्यरा॑धाः
ā naḥ stuta upa vājebhirūtī indra yāhi haribhirmandasānaḥ |
tiraścidaryaḥ savanā purūṇyāṅgūṣebhirgṛṇānaḥ satyarādhāḥ
Mandala 4
Sukta 29: Indra brings safe fording and fearlessness
Rishi: वामदेवो गौतमः · Devata: इन्द्रः · Metre: त्रिष्टुप्
5 verses · 29 of 58
What happens in this chapter
Indra brings safe fording and fearlessness
A short trishtubh hymn of Vamadeva Gautama to Indra. Praised, Indra, come with your bay horses and your help, passing by many other pressings. The wise, manly one comes to the sacrifice when the pressers call, rejoicing with the heroes who press soma. Let the singer make Indra's ears hear, so that he grows strong for giving and makes good fords and freedom from fear for us. He comes to the vipra who calls and praises him, yoking his swift horses, a thousand and a hundred. The singers ask to share in wealth from the bright, generous Indra.
आ हि ष्मा॒ याति॒ नर्य॑श्चिकि॒त्वान्हू॒यमा॑नः सो॒तृभि॒रुप॑ य॒ज्ञम् ।
स्वश्वो॒ यो अभी॑रु॒र्मन्य॑मानः सुष्वा॒णेभि॒र्मद॑ति॒ सं ह॑ वी॒रैः
ā hi ṣmā yāti naryaścikitvānhūyamānaḥ sotṛbhirupa yajñam |
svaśvo yo abhīrurmanyamānaḥ suṣvāṇebhirmadati saṃ ha vīraiḥ
श्रा॒वयेद॑स्य॒ कर्णा॑ वाज॒यध्यै॒ जुष्टा॒मनु॒ प्र दिशं॑ मन्द॒यध्यै॑ ।
उ॒द्वा॒वृ॒षा॒णो राध॑से॒ तुवि॑ष्मा॒न्कर॑न्न॒ इन्द्र॑ः सुती॒र्थाभ॑यं च
śrāvayedasya karṇā vājayadhyai juṣṭāmanu pra diśaṃ mandayadhyai |
udvāvṛṣāṇo rādhase tuviṣmānkaranna indraḥ sutīrthābhayaṃ ca
अच्छा॒ यो गन्ता॒ नाध॑मानमू॒ती इ॒त्था विप्रं॒ हव॑मानं गृ॒णन्त॑म् ।
उप॒ त्मनि॒ दधा॑नो धु॒र्या॒३॒॑शून्स॒हस्रा॑णि श॒तानि॒ वज्र॑बाहुः
acchā yo gantā nādhamānamūtī itthā vipraṃ havamānaṃ gṛṇantam |
upa tmani dadhāno dhuryāśūnsahasrāṇi śatāni vajrabāhuḥ
त्वोता॑सो मघवन्निन्द्र॒ विप्रा॑ व॒यं ते॑ स्याम सू॒रयो॑ गृ॒णन्त॑ः ।
भे॒जा॒नासो॑ बृ॒हद्दि॑वस्य रा॒य आ॑का॒य्य॑स्य दा॒वने॑ पुरु॒क्षोः
tvotāso maghavannindra viprā vayaṃ te syāma sūrayo gṛṇantaḥ |
bhejānāso bṛhaddivasya rāya ākāyyasya dāvane purukṣoḥ
Text source: Wikisource · CC BY-SA 4.0 (Wikisource transcription of a public-domain text)