Rishi: गाथिनो विश्वामित्रः · Devata: विश्वे देवाः · Metre: त्रिष्टुप्
6 verses · 57 of 62
Six trishtubh verses of Vishvamitra to the Vishvedevas. The discerning one found the rishi's thought like a cow roaming free without a herdsman, who at once yielded abundant milk; Indra and Agni are her praisers. Indra, Pushan and the two strong-handed ones milked her. The sisters seek the bull's strength and know the embryo in him. The rishi addresses Heaven and Earth, yoking the stones at the rite. The last two verses turn to Agni: with your honeyed, wise tongue, seat all the devas here and give them sweetness to drink; grant us a kindly mind, like a stream from a mountain.
प्र मे॑ विवि॒क्वाँ अ॑विदन्मनी॒षां धे॒नुं चर॑न्तीं॒ प्रयु॑ता॒मगो॑पाम् ।
स॒द्यश्चि॒द्या दु॑दु॒हे भूरि॑ धा॒सेरिन्द्र॒स्तद॒ग्निः प॑नि॒तारो॑ अस्याः
pra me vivikvām̐ avidanmanīṣāṃ dhenuṃ carantīṃ prayutāmagopām |
sadyaścidyā duduhe bhūri dhāserindrastadagniḥ panitāro asyāḥ
इन्द्र॒ः सु पू॒षा वृष॑णा सु॒हस्ता॑ दि॒वो न प्री॒ताः श॑श॒यं दु॑दुह्रे ।
विश्वे॒ यद॑स्यां र॒णय॑न्त दे॒वाः प्र वोऽत्र॑ वसवः सु॒म्नम॑श्याम्
indraḥ su pūṣā vṛṣaṇā suhastā divo na prītāḥ śaśayaṃ duduhre |
viśve yadasyāṃ raṇayanta devāḥ pra vo'tra vasavaḥ sumnamaśyām
या जा॒मयो॒ वृष्ण॑ इ॒च्छन्ति॑ श॒क्तिं न॑म॒स्यन्ती॑र्जानते॒ गर्भ॑मस्मिन् ।
अच्छा॑ पु॒त्रं धे॒नवो॑ वावशा॒ना म॒हश्च॑रन्ति॒ बिभ्र॑तं॒ वपूं॑षि
yā jāmayo vṛṣṇa icchanti śaktiṃ namasyantīrjānate garbhamasmin |
acchā putraṃ dhenavo vāvaśānā mahaścaranti bibhrataṃ vapūṃṣi
अच्छा॑ विवक्मि॒ रोद॑सी सु॒मेके॒ ग्राव्णो॑ युजा॒नो अ॑ध्व॒रे म॑नी॒षा ।
इ॒मा उ॑ ते॒ मन॑वे॒ भूरि॑वारा ऊ॒र्ध्वा भ॑वन्ति दर्श॒ता यज॑त्राः
acchā vivakmi rodasī sumeke grāvṇo yujāno adhvare manīṣā |
imā u te manave bhūrivārā ūrdhvā bhavanti darśatā yajatrāḥ
या ते॑ जि॒ह्वा मधु॑मती सुमे॒धा अग्ने॑ दे॒वेषू॒च्यत॑ उरू॒ची ।
तये॒ह विश्वाँ॒ अव॑से॒ यज॑त्रा॒ना सा॑दय पा॒यया॑ चा॒ मधू॑नि
yā te jihvā madhumatī sumedhā agne deveṣūcyata urūcī |
tayeha viśvām̐ avase yajatrānā sādaya pāyayā cā madhūni
या ते॑ अग्ने॒ पर्व॑तस्येव॒ धारास॑श्चन्ती पी॒पय॑द्देव चि॒त्रा ।
ताम॒स्मभ्यं॒ प्रम॑तिं जातवेदो॒ वसो॒ रास्व॑ सुम॒तिं वि॒श्वज॑न्याम्
yā te agne parvatasyeva dhārāsaścantī pīpayaddeva citrā |
tāmasmabhyaṃ pramatiṃ jātavedo vaso rāsva sumatiṃ viśvajanyām
Text source: Wikisource · CC BY-SA 4.0 (Wikisource transcription of a public-domain text)
