Rishi: प्रजापतिर्वैश्वामित्रः, प्रजापतिर्वाच्यो वा · Devata: विश्वे देवाः · Metre: त्रिष्टुप्
8 verses · 56 of 62
Eight trishtubh verses to the Vishvedevas by Prajapati Vaishvamitra or Prajapati Vachya. Neither the cunning nor the wise can break the first, firm vows of the devas; heaven and earth and the mountains stand unbowed. The hymn is woven on the number three: the one unmoving bears six burdens; three great ones stand above; the bull has three bellies and three faces; there are three seats and three rivers; the samraj has three mothers. Savitar is asked to send choice goods three times a day, and threefold wealth. Three times from heaven he impels Mitra and Varuna.
न ता मि॑नन्ति मा॒यिनो॒ न धीरा॑ व्र॒ता दे॒वानां॑ प्रथ॒मा ध्रु॒वाणि॑ ।
न रोद॑सी अ॒द्रुहा॑ वे॒द्याभि॒र्न पर्व॑ता नि॒नमे॑ तस्थि॒वांस॑ः
na tā minanti māyino na dhīrā vratā devānāṃ prathamā dhruvāṇi |
na rodasī adruhā vedyābhirna parvatā niname tasthivāṃsaḥ
षड्भा॒राँ एको॒ अच॑रन्बिभर्त्यृ॒तं वर्षि॑ष्ठ॒मुप॒ गाव॒ आगु॑ः ।
ति॒स्रो म॒हीरुप॑रास्तस्थु॒रत्या॒ गुहा॒ द्वे निहि॑ते॒ दर्श्येका॑
ṣaḍbhārām̐ eko acaranbibhartyṛtaṃ varṣiṣṭhamupa gāva āguḥ |
tisro mahīruparāstasthuratyā guhā dve nihite darśyekā
त्रि॒पा॒ज॒स्यो वृ॑ष॒भो वि॒श्वरू॑प उ॒त त्र्यु॒धा पु॑रु॒ध प्र॒जावा॑न् ।
त्र्य॒नी॒कः प॑त्यते॒ माहि॑नावा॒न्स रे॑तो॒धा वृ॑ष॒भः शश्व॑तीनाम्
tripājasyo vṛṣabho viśvarūpa uta tryudhā purudha prajāvān |
tryanīkaḥ patyate māhināvānsa retodhā vṛṣabhaḥ śaśvatīnām
अ॒भीक॑ आसां पद॒वीर॑बोध्यादि॒त्याना॑मह्वे॒ चारु॒ नाम॑ ।
आप॑श्चिदस्मा अरमन्त दे॒वीः पृथ॒ग्व्रज॑न्ती॒ः परि॑ षीमवृञ्जन्
abhīka āsāṃ padavīrabodhyādityānāmahve cāru nāma |
āpaścidasmā aramanta devīḥ pṛthagvrajantīḥ pari ṣīmavṛñjan
त्री ष॒धस्था॑ सिन्धव॒स्त्रिः क॑वी॒नामु॒त त्रि॑मा॒ता वि॒दथे॑षु स॒म्राट् ।
ऋ॒ताव॑री॒र्योष॑णास्ति॒स्रो अप्या॒स्त्रिरा दि॒वो वि॒दथे॒ पत्य॑मानाः
trī ṣadhasthā sindhavastriḥ kavīnāmuta trimātā vidatheṣu samrāṭ |
ṛtāvarīryoṣaṇāstisro apyāstrirā divo vidathe patyamānāḥ
त्रिरा दि॒वः स॑वित॒र्वार्या॑णि दि॒वेदि॑व॒ आ सु॑व॒ त्रिर्नो॒ अह्न॑ः ।
त्रि॒धातु॑ रा॒य आ सु॑वा॒ वसू॑नि॒ भग॑ त्रातर्धिषणे सा॒तये॑ धाः
trirā divaḥ savitarvāryāṇi divediva ā suva trirno ahnaḥ |
tridhātu rāya ā suvā vasūni bhaga trātardhiṣaṇe sātaye dhāḥ
त्रिरा दि॒वः स॑वि॒ता सो॑षवीति॒ राजा॑ना मि॒त्रावरु॑णा सुपा॒णी ।
आप॑श्चिदस्य॒ रोद॑सी चिदु॒र्वी रत्नं॑ भिक्षन्त सवि॒तुः स॒वाय॑
trirā divaḥ savitā soṣavīti rājānā mitrāvaruṇā supāṇī |
āpaścidasya rodasī cidurvī ratnaṃ bhikṣanta savituḥ savāya
त्रिरु॑त्त॒मा दू॒णशा॑ रोच॒नानि॒ त्रयो॑ राज॒न्त्यसु॑रस्य वी॒राः ।
ऋ॒तावा॑न इषि॒रा दू॒ळभा॑स॒स्त्रिरा दि॒वो वि॒दथे॑ सन्तु दे॒वाः
triruttamā dūṇaśā rocanāni trayo rājantyasurasya vīrāḥ |
ṛtāvāna iṣirā dūḻabhāsastrirā divo vidathe santu devāḥ
Text source: Wikisource · CC BY-SA 4.0 (Wikisource transcription of a public-domain text)
