Rishi: गाथिनो विश्वामित्रः · Devata: इन्द्रः · Metre: त्रिष्टुप्
5 verses · 46 of 62
Five trishtubh verses of Vishvamitra to Indra. The rishi praises the heroic deeds of the warrior bull, self-ruling, fierce, young yet firm, unaging, wielder of the vajra. Great buffalo, winner of riches, Indra is the one king of the whole world, who makes people fight and makes them dwell. He surpasses every measure and is beyond heaven, earth and the wide air. The pressed Somas enter him, wide and deep, as streams enter the sea. Heaven and earth carry the Soma for him as a mother bears a child, and the adhvaryus press and cleanse it for him to drink.
यु॒ध्मस्य॑ ते वृष॒भस्य॑ स्व॒राज॑ उ॒ग्रस्य॒ यून॒ः स्थवि॑रस्य॒ घृष्वे॑ः ।
अजू॑र्यतो व॒ज्रिणो॑ वी॒र्या॒३॒॑णीन्द्र॑ श्रु॒तस्य॑ मह॒तो म॒हानि॑
yudhmasya te vṛṣabhasya svarāja ugrasya yūnaḥ sthavirasya ghṛṣveḥ |
ajūryato vajriṇo vīryāṇīndra śrutasya mahato mahāni
म॒हाँ अ॑सि महिष॒ वृष्ण्ये॑भिर्धन॒स्पृदु॑ग्र॒ सह॑मानो अ॒न्यान् ।
एको॒ विश्व॑स्य॒ भुव॑नस्य॒ राजा॒ स यो॒धया॑ च क्ष॒यया॑ च॒ जना॑न्
mahām̐ asi mahiṣa vṛṣṇyebhirdhanaspṛdugra sahamāno anyān |
eko viśvasya bhuvanasya rājā sa yodhayā ca kṣayayā ca janān
प्र मात्रा॑भी रिरिचे॒ रोच॑मान॒ः प्र दे॒वेभि॑र्वि॒श्वतो॒ अप्र॑तीतः ।
प्र म॒ज्मना॑ दि॒व इन्द्र॑ः पृथि॒व्याः प्रोरोर्म॒हो अ॒न्तरि॑क्षादृजी॒षी
pra mātrābhī ririce rocamānaḥ pra devebhirviśvato apratītaḥ |
pra majmanā diva indraḥ pṛthivyāḥ prorormaho antarikṣādṛjīṣī
उ॒रुं ग॑भी॒रं ज॒नुषा॒भ्यु१॒॑ग्रं वि॒श्वव्य॑चसमव॒तं म॑ती॒नाम् ।
इन्द्रं॒ सोमा॑सः प्र॒दिवि॑ सु॒तास॑ः समु॒द्रं न स्र॒वत॒ आ वि॑शन्ति
uruṃ gabhīraṃ januṣābhyugraṃ viśvavyacasamavataṃ matīnām |
indraṃ somāsaḥ pradivi sutāsaḥ samudraṃ na sravata ā viśanti
यं सोम॑मिन्द्र पृथि॒वीद्यावा॒ गर्भं॒ न मा॒ता बि॑भृ॒तस्त्वा॒या ।
तं ते॑ हिन्वन्ति॒ तमु॑ ते मृजन्त्यध्व॒र्यवो॑ वृषभ॒ पात॒वा उ॑
yaṃ somamindra pṛthivīdyāvā garbhaṃ na mātā bibhṛtastvāyā |
taṃ te hinvanti tamu te mṛjantyadhvaryavo vṛṣabha pātavā u
Text source: Wikisource · CC BY-SA 4.0 (Wikisource transcription of a public-domain text)
