अ॒ग्निमु॒षस॑म॒श्विना॑ दधि॒क्रां व्यु॑ष्टिषु हवते॒ वह्नि॑रु॒क्थैः ।
सु॒ज्योति॑षो नः शृण्वन्तु दे॒वाः स॒जोष॑सो अध्व॒रं वा॑वशा॒नाः
agnimuṣasamaśvinā dadhikrāṃ vyuṣṭiṣu havate vahnirukthaiḥ |
sujyotiṣo naḥ śṛṇvantu devāḥ sajoṣaso adhvaraṃ vāvaśānāḥ
Mandala 3
Sukta 20: Agni's three tongues and three bodies
Rishi: गाथी कौशिकः · Devata: अग्निः, १, ५ विश्वे देवाः · Metre: त्रिष्टुप्
5 verses · 20 of 62
What happens in this chapter
Agni's three tongues and three bodies
Gathi Kaushika's trishtubh hymn, mainly to Agni, with the first and last verses to the Vishvedevas. At daybreak the priest calls Agni, Ushas, the Ashvins and Dadhikra. Agni has three strengths, three seats, three tongues born of rita and three bodies dear to the devas; with them he is asked to guard the hymns. He holds many names of the immortal, and the powers of the wise are joined in him. Like Bhaga he leads the peoples. The closing verse calls Dadhikra, Agni, Ushas, Brihaspati, Savitar, the Ashvins, Mitra-Varuna, Bhaga, the Vasus, Rudras and Adityas.
अग्ने॒ त्री ते॒ वाजि॑ना॒ त्री ष॒धस्था॑ ति॒स्रस्ते॑ जि॒ह्वा ऋ॑तजात पू॒र्वीः ।
ति॒स्र उ॑ ते त॒न्वो॑ दे॒ववा॑ता॒स्ताभि॑र्नः पाहि॒ गिरो॒ अप्र॑युच्छन्
agne trī te vājinā trī ṣadhasthā tisraste jihvā ṛtajāta pūrvīḥ |
tisra u te tanvo devavātāstābhirnaḥ pāhi giro aprayucchan
अग्ने॒ भूरी॑णि॒ तव॑ जातवेदो॒ देव॑ स्वधावो॒ऽमृत॑स्य॒ नाम॑ ।
याश्च॑ मा॒या मा॒यिनां॑ विश्वमिन्व॒ त्वे पू॒र्वीः सं॑द॒धुः पृ॑ष्टबन्धो
agne bhūrīṇi tava jātavedo deva svadhāvo'mṛtasya nāma |
yāśca māyā māyināṃ viśvaminva tve pūrvīḥ saṃdadhuḥ pṛṣṭabandho
अ॒ग्निर्ने॒ता भग॑ इव क्षिती॒नां दैवी॑नां दे॒व ऋ॑तु॒पा ऋ॒तावा॑ ।
स वृ॑त्र॒हा स॒नयो॑ वि॒श्ववे॑दा॒ः पर्ष॒द्विश्वाति॑ दुरि॒ता गृ॒णन्त॑म्
agnirnetā bhaga iva kṣitīnāṃ daivīnāṃ deva ṛtupā ṛtāvā |
sa vṛtrahā sanayo viśvavedāḥ parṣadviśvāti duritā gṛṇantam
द॒धि॒क्राम॒ग्निमु॒षसं॑ च दे॒वीं बृह॒स्पतिं॑ सवि॒तारं॑ च दे॒वम् ।
अ॒श्विना॑ मि॒त्रावरु॑णा॒ भगं॑ च॒ वसू॑न्रु॒द्राँ आ॑दि॒त्याँ इ॒ह हु॑वे
dadhikrāmagnimuṣasaṃ ca devīṃ bṛhaspatiṃ savitāraṃ ca devam |
aśvinā mitrāvaruṇā bhagaṃ ca vasūnrudrām̐ ādityām̐ iha huve
Text source: Wikisource · CC BY-SA 4.0 (Wikisource transcription of a public-domain text)