भवा॑ नो अग्ने सु॒मना॒ उपे॑तौ॒ सखे॑व॒ सख्ये॑ पि॒तरे॑व सा॒धुः ।
पु॒रु॒द्रुहो॒ हि क्षि॒तयो॒ जना॑नां॒ प्रति॑ प्रती॒चीर्द॑हता॒दरा॑तीः
bhavā no agne sumanā upetau sakheva sakhye pitareva sādhuḥ |
purudruho hi kṣitayo janānāṃ prati pratīcīrdahatādarātīḥ
Mandala 3
Sukta 18: Be kind like a friend, Agni
Rishi: कतो वैश्वामित्रः · Devata: अग्निः · Metre: त्रिष्टुप्
5 verses · 18 of 62
What happens in this chapter
Be kind like a friend, Agni
Kata Vaishvamitra's trishtubh hymn to Agni. The rishi asks Agni to be kindly when approached, like a friend to a friend, like parents, and to burn the hostile who stand against them. He is to scorch enemies near and far and the scheming of the ungenerous. With fuel and ghee the rishi offers for strength and power, praying with the sacred word for a hundredfold gain. He asks Agni to give vigour and wealth to the Vishvamitras, who have groomed his body many times, and to grant treasure when kindled in the singer's home.
तपो॒ ष्व॑ग्ने॒ अन्त॑राँ अ॒मित्रा॒न्तपा॒ शंस॒मर॑रुष॒ः पर॑स्य ।
तपो॑ वसो चिकिता॒नो अ॒चित्ता॒न्वि ते॑ तिष्ठन्ताम॒जरा॑ अ॒यास॑ः
tapo ṣvagne antarām̐ amitrāntapā śaṃsamararuṣaḥ parasya |
tapo vaso cikitāno acittānvi te tiṣṭhantāmajarā ayāsaḥ
इ॒ध्मेना॑ग्न इ॒च्छमा॑नो घृ॒तेन॑ जु॒होमि॑ ह॒व्यं तर॑से॒ बला॑य ।
याव॒दीशे॒ ब्रह्म॑णा॒ वन्द॑मान इ॒मां धियं॑ शत॒सेया॑य दे॒वीम्
idhmenāgna icchamāno ghṛtena juhomi havyaṃ tarase balāya |
yāvadīśe brahmaṇā vandamāna imāṃ dhiyaṃ śataseyāya devīm
उच्छो॒चिषा॑ सहसस्पुत्र स्तु॒तो बृ॒हद्वय॑ः शशमा॒नेषु॑ धेहि ।
रे॒वद॑ग्ने वि॒श्वामि॑त्रेषु॒ शं योर्म॑र्मृ॒ज्मा ते॑ त॒न्वं१॒॑ भूरि॒ कृत्व॑ः
ucchociṣā sahasasputra stuto bṛhadvayaḥ śaśamāneṣu dhehi |
revadagne viśvāmitreṣu śaṃ yormarmṛjmā te tanvaṃ bhūri kṛtvaḥ
कृ॒धि रत्नं॑ सुसनित॒र्धना॑नां॒ स घेद॑ग्ने भवसि॒ यत्समि॑द्धः ।
स्तो॒तुर्दु॑रो॒णे सु॒भग॑स्य रे॒वत्सृ॒प्रा क॒रस्ना॑ दधिषे॒ वपूं॑षि
kṛdhi ratnaṃ susanitardhanānāṃ sa ghedagne bhavasi yatsamiddhaḥ |
stoturduroṇe subhagasya revatsṛprā karasnā dadhiṣe vapūṃṣi
Text source: Wikisource · CC BY-SA 4.0 (Wikisource transcription of a public-domain text)