Rishi: सौचीकोऽग्निः वैश्वानरो वा, सप्तिर्वाजंभरो वा · Devata: अग्निः · Metre: त्रिष्टुप्
7 verses · 80 of 191
Agni Saucika, or Vaishvanara, or Sapti Vajambhara, praises Agni in Trishtubh, and every line begins with his name. Agni gives the swift horse that wins prizes, Agni gives the famous hero who completes his work, Agni gives the woman who bears heroes. Agni entered heaven and earth. Agni rescued Jaratkarna, burned Jarutha out of the waters, saved Atri in the heat and blessed Nrimedha with offspring. Rishis call him with hymns, men hard-pressed in battle call him, birds flying in the mid-space call him. The Ribhus fashioned a prayer for Agni; the rishi asks the youngest Agni to protect the singer and bring great wealth.
अ॒ग्निः सप्तिं॑ वाजम्भ॒रं द॑दात्य॒ग्निर्वी॒रं श्रुत्यं॑ कर्मनि॒ःष्ठाम् ।
अ॒ग्नी रोद॑सी॒ वि च॑रत्सम॒ञ्जन्न॒ग्निर्नारीं॑ वी॒रकु॑क्षिं॒ पुरं॑धिम्
agniḥ saptiṃ vājambharaṃ dadātyagnirvīraṃ śrutyaṃ karmaniḥṣṭhām |
agnī rodasī vi caratsamañjannagnirnārīṃ vīrakukṣiṃ puraṃdhim
अ॒ग्नेरप्न॑सः स॒मिद॑स्तु भ॒द्राग्निर्म॒ही रोद॑सी॒ आ वि॑वेश ।
अ॒ग्निरेकं॑ चोदयत्स॒मत्स्व॒ग्निर्वृ॒त्राणि॑ दयते पु॒रूणि॑
agnerapnasaḥ samidastu bhadrāgnirmahī rodasī ā viveśa |
agnirekaṃ codayatsamatsvagnirvṛtrāṇi dayate purūṇi
अ॒ग्निर्ह॒ त्यं जर॑त॒ः कर्ण॑मावा॒ग्निर॒द्भ्यो निर॑दह॒ज्जरू॑थम् ।
अ॒ग्निरत्रिं॑ घ॒र्म उ॑रुष्यद॒न्तर॒ग्निर्नृ॒मेधं॑ प्र॒जया॑सृज॒त्सम्
agnirha tyaṃ jarataḥ karṇamāvāgniradbhyo niradahajjarūtham |
agniratriṃ gharma uruṣyadantaragnirnṛmedhaṃ prajayāsṛjatsam
अ॒ग्निर्दा॒द्द्रवि॑णं वी॒रपे॑शा अ॒ग्निरृषिं॒ यः स॒हस्रा॑ स॒नोति॑ ।
अ॒ग्निर्दि॒वि ह॒व्यमा त॑ताना॒ग्नेर्धामा॑नि॒ विभृ॑ता पुरु॒त्रा
agnirdāddraviṇaṃ vīrapeśā agnirṛṣiṃ yaḥ sahasrā sanoti |
agnirdivi havyamā tatānāgnerdhāmāni vibhṛtā purutrā
अ॒ग्निमु॒क्थैरृष॑यो॒ वि ह्व॑यन्ते॒ऽग्निं नरो॒ याम॑नि बाधि॒तास॑ः ।
अ॒ग्निं वयो॑ अ॒न्तरि॑क्षे॒ पत॑न्तो॒ऽग्निः स॒हस्रा॒ परि॑ याति॒ गोना॑म्
agnimukthairṛṣayo vi hvayante'gniṃ naro yāmani bādhitāsaḥ |
agniṃ vayo antarikṣe patanto'gniḥ sahasrā pari yāti gonām
अ॒ग्निं विश॑ ईळते॒ मानु॑षी॒र्या अ॒ग्निं मनु॑षो॒ नहु॑षो॒ वि जा॒ताः ।
अ॒ग्निर्गान्ध॑र्वीं प॒थ्या॑मृ॒तस्या॒ग्नेर्गव्यू॑तिर्घृ॒त आ निष॑त्ता
agniṃ viśa īḻate mānuṣīryā agniṃ manuṣo nahuṣo vi jātāḥ |
agnirgāndharvīṃ pathyāmṛtasyāgnergavyūtirghṛta ā niṣattā
अ॒ग्नये॒ ब्रह्म॑ ऋ॒भव॑स्ततक्षुर॒ग्निं म॒हाम॑वोचामा सुवृ॒क्तिम् ।
अग्ने॒ प्राव॑ जरि॒तारं॑ यवि॒ष्ठाग्ने॒ महि॒ द्रवि॑ण॒मा य॑जस्व
agnaye brahma ṛbhavastatakṣuragniṃ mahāmavocāmā suvṛktim |
agne prāva jaritāraṃ yaviṣṭhāgne mahi draviṇamā yajasva
Text source: Wikisource · CC BY-SA 4.0 (Wikisource transcription of a public-domain text)
